కొత్త క్రిమినల్‌ చట్టాలకు రాష్ట్రపతి ఆమోదం

గత వారం పార్లమెంటు ఆమోదం పొందిన మూడు కొత్త క్రిమినల్‌ జస్టిస్ బిల్లులకు రాష్ట్రపతి ద్రౌపది ముర్ము సోమవారం ఆమోదం తెలిపారు. భారతీయ నాగరిక సురక్ష సంహిత, భారతీయ సాక్ష్య అధినియం, భారతీయ న్యాయ సంహిత బిల్లులను రాష్ట్రపతి ద్రౌపది ముర్ము ఆమోదించారు. ప్రస్తుతం అమలు అవుతున్న ఐపీసీ, సీఆర్‌పీసీ, ఎవిడెన్స్‌ యాక్టుల స్థానంలో ఇక కొత్త చట్టాలు అమలులోకి రానున్నాయి. వలసరాజ్యాల కాలం నాటి ఇండియన్ పీనల్ కోడ్, క్రిమినల్ ప్రొసీజర్ కోడ్, 1872 నాటి ఇండియన్ ఎవిడెన్స్ యాక్ట్‌లను ఈ చట్టాలు భర్తీ చేస్తాయి.

పార్లమెంట్‌లో మూడు బిల్లులపై జరిగిన చర్చకు కేంద్ర హోంమంత్రి అమిత్ షా సమాధానమిస్తూ.. శిక్ష విధించడం కంటే న్యాయం చేయడంపై దృష్టి సారించినట్లు చెప్పారు. వివిధ నేరాలు, వాటి శిక్షలను నిర్వచించడం ద్వారా దేశంలోని నేర న్యాయ వ్యవస్థను పూర్తిగా మార్చడం ఈ మూడు చట్టాల లక్ష్యం. ఇవి ఉగ్రవాదానికి స్పష్టమైన నిర్వచనాన్ని ఇచ్చాయి, దేశద్రోహాన్ని నేరంగా రద్దు చేశాయి. “రాజ్యంపై నేరాలు” పేరుతో కొత్త సెక్షన్‌ను ప్రవేశపెట్టాయి. ఆగస్టులో జరిగిన పార్లమెంట్ వర్షాకాల సమావేశాల్లో ఈ బిల్లులను తొలిసారిగా ప్రవేశపెట్టారు. హోం వ్యవహారాలపై స్టాండింగ్ కమిటీ అనేక సిఫార్సులు చేసిన తర్వాత, ప్రభుత్వం బిల్లులను ఉపసంహరించుకోవాలని నిర్ణయించుకుంది.

గత వారం వాటి రీడ్రాఫ్టెడ్ వెర్షన్‌లను ప్రవేశపెట్టింది. మూడు బిల్లులు సమగ్ర సంప్రదింపుల తర్వాత రూపొందించబడ్డాయి. తొలిసారిగా భారతీయ న్యాయ సంహితలో ఉగ్రవాదం అనే పదాన్ని నిర్వచించారు. ఇది ఐపిసిలో లేదు. కొత్త చట్టాల ప్రకారం, జరిమానాలు విధించే మేజిస్ట్రేట్ అధికారాన్ని అలాగే ప్రకటిత నేరస్థుడిని ప్రకటించే పరిధిని పెంచారు. భారతీయ న్యాయ సంహిత వేర్పాటు చర్యలు, సాయుధ తిరుగుబాటు, విధ్వంసక కార్యకలాపాలు, వేర్పాటువాద కార్యకలాపాలు లేదా దేశద్రోహ చట్టం యొక్క కొత్త అవతార్‌లో సార్వభౌమాధికారం లేదా ఐక్యతకు అపాయం కలిగించడం వంటి నేరాలను జాబితా చేస్తుంది. దేశంలోని క్రిమినల్‌ జస్టిస్‌ సిస్టమ్‌ను సంపూర్ణంగా ప్రక్షాళన చేయడం కోసం ఈ కొత్త చట్టాలను రూపొందించినట్లు ప్రభుత్వం తెలిపింది.