కేంద్ర కీలక నిర్ణయం.. అప్రెంటిస్‌ల స్టైఫండ్‌ భారీగా పెంపు

అప్రెంటిసెస్‌లకు అందించే స్టైఫండ్‌ను భారీగా పెంచేందుకు కేంద్ర ప్రభుత్వం నిర్ణయించింది. అప్రెంటిస్‌లలో డ్రాపౌట్ రేటును తగ్గించే ప్రయత్నంలో, నైపుణ్య అభివృద్ధి మరియు వ్యవస్థాపకత మంత్రిత్వ శాఖ (MSDE) నేషనల్ అప్రెంటిస్‌షిప్ ప్రమోషన్ స్కీమ్ (NAPS), నేషనల్ అప్రెంటిస్‌షిప్ ట్రైనింగ్ స్కీమ్ (NATS) కింద స్టైపెండ్‌లో 36 శాతం పెంపును ప్రతిపాదించింది. దీంతో ఐదు కేటగిరీల్లో ప్రస్తుతం రూ.5 వేల నుంచి రూ.9 వేల మధ్య ఉన్న స్టైఫండ్‌ రూ.6,800 నుంచి రూ.12,300కు చేరనుంది. సోమవారం నాడు కేంద్రమంత్రి జయంత్‌ నేతృత్వంలోని జరిగిన సెంట్రల్ అప్రెంటిస్‌షిప్ కౌన్సిల్ (సిఎసి) 38వ సమావేశంలో ఈ ప్రతిపాదనలను సిఫార్సు చేశారు. ఈ ప్రతిపాదనలను ఇప్పుడు కేంద్ర మంత్రివర్గం ఆమోదం కోసం పంపుతారు.

ఈ పెంపు ప్రతిపాదనలను ప్రభుత్వం నోటిఫై చేస్తే జులై నుంచి అమల్లోకి రానుందని సమాచారం. కాగా PM - NAPS కింద కేంద్రం వాటా రూ.1500 లేదా 25 శాతం, NATS కింద ప్రభుత్వ వాటా 50 శాతంగా ఉంది. ఈ ప్రతిపాదనలకు కేంద్ర మంత్రివర్గం ఆమోదం తెలిపిన తర్వాత, స్టైపెండ్ ప్రస్తుతం ఉన్న రూ.5,000-రూ.9,000 నుంచి రూ.6800-రూ.12,300 వరకు పెరుగుతుంది. "డ్రాపౌట్ రేట్లను తగ్గించడం, అప్రెంటిస్‌షిప్ శిక్షణ తీసుకోవడానికి ఎక్కువ మంది అభ్యర్థులను ఆకర్షించడం దీని లక్ష్యం" అని సమావేశం తర్వాత విడుదల చేసిన ఒక ప్రకటనలో ఎంఎస్‌డీఈ తెలిపింది.

సీఏసీ సమావేశం ప్రస్తుత పరిశ్రమల జాబితాను (1987 కోడ్) జాతీయ పారిశ్రామిక వర్గీకరణ (NIC) కోడ్ 2008కి అనుగుణంగా ఉన్న దానితో భర్తీ చేయాలని ప్రతిపాదించింది, తద్వారా IT, సాఫ్ట్‌వేర్ సేవలు, టెలికమ్యూనికేషన్స్, బయోటెక్నాలజీ మరియు పునరుత్పాదక ఇంధనం వంటి అభివృద్ధి చెందుతున్న రంగాలను చేర్చడానికి అప్రెంటిస్‌షిప్ శిక్షణ పరిధిని విస్తరించాలని కూడా ప్రతిపాదించింది. "అప్రెంటిస్‌షిప్ అనేది కేవలం నైపుణ్యాభివృద్ధి యంత్రాంగం కాదు, ఇది విద్య, పరిశ్రమ, ఉపాధిని కలిపే వారధి, ముఖ్యంగా మన గ్రామీణ యువతకు" అని జయంత్ చౌదరి అన్నారు.