నేటి నుంచి ప్రధాని మోదీ 3 దేశాల పర్యటన

జోర్డాన్, ఇథియోపియా, ఒమాన్ దేశాలకు మూడు రోజుల పర్యటనకు ప్రధాని నేడు బయలుదేరుతున్నారని ప్రధాని కార్యాలయం తెలిపింది. ఈ మూడు దేశాలతో భారత్‌కు ప్రాచీన నాగరికత సంబంధాలు మాత్రమే కాకుండా, బలమైన ఆధునిక ద్వైపాక్షిక సంబంధాలు ఉన్నాయని ప్రధాని పేర్కొన్నారు.

మొదటగా జోర్డాన్‌కు వెళ్లనున్న ప్రధాని, అక్కడి రాజు హిజ్ మజెస్టీ కింగ్ అబ్దుల్లా II ఇబ్న్ అల్ హుస్సేన్ ఆహ్వానం మేరకు అమాన్‌లో పర్యటించనున్నారు. ఈ పర్యటనతో భారత్–జోర్డాన్ దౌత్య సంబంధాలకు 75 ఏళ్లు పూర్తవుతున్నాయి. ఈ సందర్భంగా రాజు అబ్దుల్లా II, జోర్డాన్ ప్రధాని హెచ్.ఈ. జాఫర్ హసన్‌తో విస్తృత చర్చలు జరపనున్నారు. అలాగే క్రౌన్ ప్రిన్స్ అల్ హుస్సేన్ బిన్ అబ్దుల్లా IIతో కూడా సమావేశం కానున్నారు. అమాన్‌లో నివసిస్తున్న భారతీయ సమాజంతో ప్రధాని భేటీ కానున్నారు.

అనంతరం ఇథియోపియా ప్రధాని డా. అబియ్ అహ్మద్ అలీ ఆహ్వానంతో ప్రధాని తొలిసారిగా ఇథియోపియాకు వెళ్లనున్నారు. ఆఫ్రికన్ యూనియన్ ప్రధాన కార్యాలయం ఉన్న అడిస్ అబాబాలో ప్రధాని, ఇథియోపియా ప్రధాని డా. అబియ్ అహ్మద్ అలీతో ద్వైపాక్షిక చర్చలు నిర్వహిస్తారు. అలాగే అక్కడి భారతీయ ప్రవాసులతో కూడా సమావేశమవుతారు. ఇథియోపియా పార్లమెంట్ సంయుక్త సమావేశాన్ని ఉద్దేశించి ప్రసంగించనున్న ప్రధాని, ‘ప్రజాస్వామ్యానికి తల్లి’గా భారత ప్రయాణం, గ్లోబల్ సౌత్‌కు భారత్–ఇథియోపియా భాగస్వామ్యం అందించే విలువలపై తన ఆలోచనలు పంచుకోనున్నారు.

పర్యటన చివరి దశలో ఒమాన్ సుల్తానేట్‌కు వెళ్లనున్న ప్రధాని, భారత్–ఒమాన్ దౌత్య సంబంధాలకు 70 ఏళ్లు పూర్తైన సందర్భంగా మస్కట్‌లో ఒమాన్ సుల్తాన్‌తో భేటీ కానున్నారు. ఈ సందర్భంగా వ్యూహాత్మక భాగస్వామ్యం, వాణిజ్య–ఆర్థిక సంబంధాల బలోపేతంపై చర్చలు జరపనున్నారు. అలాగే ఒమాన్‌లో నివసిస్తున్న భారతీయ ప్రవాసులను ఉద్దేశించి ప్రసంగించనున్నారు.