వాయనాడ్ విపత్తు.. అమిత్ షా వ్యాఖ్య‌ల‌ను తోసిపుచ్చిన‌ సీఎం పినరయి విజయన్

కేరళలోని వాయనాడ్ జిల్లాలో కొండచరియలు విరిగిపడటంతో భారీ విధ్వంసం సంభవించింది. మరణాల సంఖ్య నిరంతరం పెరుగుతోంది. మరోవైపు ఈ విపత్తుపై రాజకీయాలు కూడా వేడెక్కాయి. కేంద్ర హోంమంత్రి అమిత్ షా మాట్లాడుతూ.. కేరళ ప్రభుత్వం గతంలో కేంద్రం ఇచ్చిన హెచ్చరికలను పట్టించుకోలేదని అన్నారు. వాయనాడ్ జిల్లాలో కొండచరియలు విరిగిపడక ముందే.. భారీ వర్షాలకు సంబంధించి భారత వాతావరణ శాఖ (ఐఎండీ) ఆరెంజ్ అలర్ట్ జారీ చేసిందని సీఎం పినరయి విజయన్ తెలిపారు. జిల్లాలో 572 మిల్లీమీటర్ల వర్షపాతం నమోదైంది. ఇది IMD అంచనా కంటే చాలా ఎక్కువని అన్నారు.

కేరళ ముఖ్యమంత్రి పినరయి విజయన్ మాట్లాడుతూ.. 'ఐఎండీ ఇప్పటికే విపత్తు ప్రభావిత ప్రాంతాలకు ఆరెంజ్ అలర్ట్ జారీ చేసింది. 115 నుంచి 204 మిల్లీమీటర్ల మధ్య వర్షపాతం నమోదయ్యే అవకాశం ఉందని చెప్పారు. నిజానికి ఇంతకంటే ఎక్కువ వర్షపాతం నమోదైంది. తొలి 24 గంటల్లో 22 మి.మీ వర్షం కురవగా, ఆ తర్వాత 24 గంటల్లో 371 మి.మీ వర్షం కురిసింది. మొత్తం మీద 48 గంటల్లో 572 మిల్లీమీటర్ల వర్షపాతం నమోదైంది. ఇది గతంలో ఇచ్చిన హెచ్చరిక కంటే చాలా ఎక్కువ. విపత్తుకు ముందు వయనాడ్ జిల్లాకు రెడ్ అలర్ట్ ప్రకటించలేదని, కొండచరియలు విరిగిపడిన తర్వాత ఉదయం 6 గంటలకు రెడ్ అలర్ట్ ప్రకటించింద‌ని ముఖ్యమంత్రి తెలిపారు. కొండచరియలు విరిగిపడే అవకాశం ఉందని ముందస్తు హెచ్చరికలు జారీ చేసిన కేంద్ర జల సంఘం కూడా జూలై 23 నుంచి జూలై 29 మధ్య ఎలాంటి హెచ్చరికలు చేయలేదని విజయన్ తెలిపారు.

'వాతావరణ మార్పుల వల్ల కేర‌ళ‌ వాతావరణం మారిపోయిందని కేంద్ర ప్రభుత్వం అర్థం చేసుకోవాలి. దీని కోసం మనం చురుకైన చర్యలు తీసుకోవాలి. రాష్ట్రంలో రుతుపవనాల ప్రారంభంలోనే నేషనల్ డిజాస్టర్ రెస్పాన్స్ ఫోర్స్ (ఎన్‌డిఆర్‌ఎఫ్) బృందాలను మోహరించాలని కేరళ ప్రభుత్వం అభ్యర్థించిందని ఆయన తెలిపారు. పార్లమెంట్‌లో చేసిన ప్రకటనలు నిరాధారమన్నారు. పార్లమెంట్‌లో హోంమంత్రి సమర్పించిన సమాచారంలో ఈ వాస్తవాలు లేవన్నారు.

గతంలో ఇచ్చిన హెచ్చరికను కేరళ ప్రభుత్వం పట్టించుకోలేదని హోంమంత్రి అమిత్ షా బుధవారం రాజ్యసభలో అన్నారు. రాష్ట్రంలో ఎన్‌డిఆర్‌ఎఫ్‌ను మోహరించి.. హెచ్చరించినా పట్టించుకోలేదన్నారు. అలాగే కేరళకు ఏడు రోజుల ముందుగానే వాతావరణ హెచ్చరికలు జారీ చేశామన్నారు. జూలై 24న ఈ విషయమై హెచ్చరిక కూడా జారీ చేశామ‌న్నారు.