నేడు బీహార్ సీఎంగా 10వ సారి ప్రమాణస్వీకారం చేయనున్న నితీష్ కుమార్

బీహార్ ముఖ్యమంత్రిగా నితీశ్‌ కుమార్ మరోసారి బాధ్యతలు స్వీకరించడానికి రంగం సిద్ధమైంది. తాజాగా జరిగిన ఎన్డీఏ శాసనసభ్యుల సమావేశంలో ఆయనను ఎన్డీఏ నేతగా ఏకగ్రీవంగా ఎన్నుకున్నారు. ఈ మేరకు బీజేపీ నేత సమ్రాట్ చౌధరీ నితీశ్ పేరును ప్రతిపాదించగా, సమావేశం మొత్తం ఆయనకు మద్దతు తెలిపింది.

గురువారం ఉదయం నితీశ్ కుమార్ అప్రతిహతమైన పదోసారి ముఖ్యమంత్రిగా ప్రమాణ స్వీకారం చేయనున్నారు. ఎన్డీఏ సమావేశం అనంతరం నితీశ్ కుమార్ రాజ్‌భవన్‌కు వెళ్లి, ముఖ్యమంత్రి పదవికి రాజీనామా సమర్పించారు. అనంతరం ఎన్డీఏ మిత్రపక్షాల మద్దతు పత్రాలను గవర్నర్ అరీఫ్‌ మహ్మద్ ఖాన్‌కు అందజేసి ప్రభుత్వ నిర్మాణానికి అవకాశం కావాలని కోరారు. సెంట్రల్ హాల్‌లో జరిగిన ఎన్డీఏ శాసనసభ్యుల సమావేశంలో పాల్గొన్నాను అని నితీశ్ తెలిపారు.

ఎల్జేపీ (ఆర్‌వీ) అధినేత చిరాగ్ పస్వాన్ బీహార్ ప్రజలకు ధన్యవాదాలు తెలుపుతూ “నితీశ్ జీ మా నాయకుడు” అన్నారు. ఉపేంద్ర కుష్వాహా మహిళా ఓటర్లకు ప్రత్యేక ధన్యవాదాలు తెలుపుతూ.. నితీశ్ చేసిన పనులు ఎన్డీఏ విజయంలో కీలకమని అన్నారు. హామ్ నాయకుడు జితన్ రామ్ మాంఝీ నితీశ్‌ను ప్రశంసిస్తూ “ఇరవై ఏళ్లుగా ఇంతకాలం యాంటీ ఇన్‌కంబెన్సీ లేకుండా పనిచేసిన నాయకుడు అరుదు. ఆయనకు దీర్ఘాయుష్షు కలగాలి” అన్నారు.

243 సభ్యుల బీహార్ అసెంబ్లీలో ఎన్డీఏ 202 సీట్లు సాధించి భారీ మెజారిటీ సాధించింది.

బీజేపీ – 89 సీట్లు (సింగిల్ లార్జెస్ట్ పార్టీ)

జేడీయూ – 85 సీట్లు

ఎల్జేపీ (ఆర్‌వీ) – 19

హామ్ – 5

ఆర్‌ఎల్‌ఎం – 4

భారీ ప్రమాణ స్వీకార వేడుకకు సిద్ధం

పట్నా గాంధీ మైదానంలో గురువారం ఉదయం జరిగే ప్రమాణ స్వీకారానికి భారీ ఏర్పాట్లు జరుగుతున్నాయి. ప్రధాని నరేంద్ర మోదీ, హోం మంత్రి అమిత్ షా, ఎన్డీఏ పాలిత రాష్ట్రాల ముఖ్యమంత్రులు హాజరుకానున్నారు. ఈ కార్యక్రమాన్ని ఎన్డీఏ తమ భారీ ప్రజాతీర్పుకు సంకేతంగా ప్రదర్శించనుంది.