ఆ గ్యాంగ్‌స్ట‌ర్‌ త‌మ్ముడిపై రూ.10 లక్షల రివార్డ్‌ ప్రకటించిన‌ NIA

జైలులో ఉన్నా కూడా లారెన్స్ బిష్ణోయ్ పేరు ప్రపంచ వ్యాప్తంగా మారుమోగుతోంది. బాబా సిద్ధిఖీ హత్య, సల్మాన్ ఖాన్ ఇంట్లో కాల్పుల కారణంగా లారెన్స్ బిష్ణోయ్ పేరు మరోసారి వార్తల్లో నిలిచింది. అదే సమయంలో లారెన్స్ బిష్ణోయ్ గ్యాంగ్‌ను పట్టుకోవడానికి జాతీయ దర్యాప్తు సంస్థ(ఎన్ఐఏ) ఏ చిన్న అవ‌కాశాన్ని వదలడం లేదు. గ్యాంగ్‌స్టర్ లారెన్స్ బిష్ణోయ్ సోదరుడు అన్మోల్ బిష్ణోయ్‌ను అరెస్టు చేసిన వారికి 10 లక్షల రూపాయల రివార్డును NIA ప్రకటించింది. 2022లో నమోదైన రెండు ఎన్‌ఐఏ కేసుల్లో అన్మోల్‌పై చార్జిషీట్‌ నమోదైంది.

ముంబైలో జరుగుతున్న విచారణకు సంబంధించి అతని పేరు వెలుగులోకి వచ్చింది. ఈ ఏడాది ప్రారంభంలో బాలీవుడ్ నటుడు సల్మాన్ ఖాన్ నివాసం వెలుపల జరిగిన కాల్పుల ఘటనకు సంబంధించి అన్మోల్‌ను కూడా వెతుకుతున్నారు. అన్మోల్ బిష్ణోయ్ ఆచూకీ గురించి ఎవరికైనా సమాచారం ఉంటే ముందుకు రావాలని అధికారులు కోరుతున్నారు.

అందిన సమాచారం ప్రకారం.. అన్మోల్ అనేక నేర కార్యకలాపాలలో సంబంధం కలిగి ఉన్నాడు. వ్యవస్థీకృత నేరాలలో ముఖ్యమైన వ్యక్తిగా పరిగణిస్తున్నారు. అతని అరెస్టుతో చట్టవిరుద్ధ కార్యకలాపాలకు పాల్పడుతున్న విస్తృతమైన లారెన్స్ బిష్ణోయ్ నెట్‌వర్క్ గురించి కీలక సమాచారాన్ని అందించగలదని అధికారులు భావిస్తున్నారు.

అన్మోల్‌ను పట్టుకునేందుకు ఎన్‌ఐఏ తన ప్రయత్నాలను ముమ్మరం చేసినందున.. అతన్ని పట్టుకోవడంలో సహాయపడే ఏదైనా సమాచారం అందించాలని అధికారులు ప్రజలకు విజ్ఞప్తి చేస్తున్నారు. ఈ ప్రకటన వ్యవస్థీకృత నేరాలను ఎదుర్కోవడానికి, ప్రజా భద్రతను పెంపొందించడానికి NIA నిబద్ధతను నొక్కి చెబుతుంది.