ఐఈడీ పేలుడు.. ఇద్దరు సీఆర్పీఎఫ్ జవాన్లు మృతి

ఛత్తీస్‌గఢ్‌లోని సుక్మా జిల్లాలో ఆదివారం నక్సలైట్లు జరిపిన ఇంప్రూవైజ్డ్ ఎక్స్‌ప్లోజివ్ డివైస్ (ఐఈడీ) పేలుడులో ఇద్దరు సీఆర్పీఎఫ్ జవాన్లు మరణించారు. రాయ్‌పూర్‌కు 400 కిలోమీటర్ల దూరంలో సుక్మా జిల్లాలోని సిల్గర్ - టేకల్‌గూడెం క్యాంపుల మధ్య తిమ్మాపురం గ్రామ సమీపంలో మధ్యాహ్నం 3 గంటలకు ఐఈడీ పేలుడు సంభవించిందని వార్తా సంస్థ పీటీఐ తెలిపింది. సిఆర్‌పిఎఫ్‌కు చెందిన కమాండో బెటాలియన్ ఫర్ రిసొల్యూట్ యాక్షన్ (కోబ్రా) 201 బెటాలియన్‌కు చెందిన సిబ్బంది ఆదివారం మధ్యాహ్నం 3 గంటలకు ట్రక్కు, బైక్‌లపై రోడ్ ఓపెనింగ్ పార్టీలో భాగంగా సిల్గర్ నుండి టేకులగూడెం క్యాంపులకు సాధారణ పెట్రోలింగ్‌కు వెళుతున్నారు. ఐఈడీ పేలుడు ధాటికి ట్రక్కు పేలిపోయింది. మృతులను కానిస్టేబుల్ శైలేంద్ర (29), వాహనం డ్రైవర్ విష్ణు ఆర్ (35)గా గుర్తించారు.

సైనికుల మృతదేహాలను ఆ ప్రాంతం నుంచి తొలగిస్తున్నామని, సెర్చ్ ఆపరేషన్ కొనసాగుతోందని పోలీసులు తెలిపారు. ఇదిలా ఉండగా, మరో ఘటనలో, ధామ్‌తరీ జిల్లాలోని ఖల్లారీ ప్రాంతంలోని అమ్‌జార్‌లో జిల్లా రిజర్వ్ గార్డ్ సిబ్బంది జరిపిన ఎన్‌కౌంటర్‌లో ఒక నక్సలైట్ మరణించాడు. డీఆర్‌జీ సైనికుల బృందం అడవిలో మావోయిస్టు వ్యతిరేక ఆపరేషన్‌లో ఉంది. అదే సమయంలో ఎన్‌కౌంటర్ జరిగింది. ఎన్‌కౌంటర్‌లో పలువురు నక్సలైట్లు గాయపడినట్లు సమాచారం. అడపాదడపా కాల్పులతో ఎన్‌కౌంటర్ ఇంకా కొనసాగుతోంది. సెర్చ్ ఆపరేషన్ కొనసాగుతోందని పోలీసు సూపరింటెండెంట్ ఆంజనేయ వర్ష్నే తెలిపారు. అంతకుముందు ఏప్రిల్‌లో ఛత్తీస్‌గఢ్‌లోని బీజాపూర్ జిల్లాలో భద్రతా దళాలతో జరిగిన ఎన్‌కౌంటర్‌లో ముగ్గురు మహిళలు సహా 15 మంది నక్సలైట్లు మరణించారు.