ప్ర‌భుత్వ ఉద్యోగుల‌కు శుభ‌వార్త‌.. వారంలో ఐదు రోజుల ప‌ని.. మార్చి వ‌ర‌కు పొడిగింపు

క‌రోనా ముప్పు ఇంకా పూర్తిగా తొల‌గిపోని నేప‌థ్యంలో మ‌ధ్య‌ప్ర‌దేశ్ ప్ర‌భుత్వం కీల‌క నిర్ణ‌యం తీసుకుంది. ప్ర‌భుత్వ కార్యాల‌యంలో ఐదు రోజుల ప‌ని విధానాన్ని వ‌చ్చే ఏడాది మార్చి వ‌ర‌కూ పొడిగించింది. శ‌నివారం ఈ మేర‌కు ఆ రాష్ట్ర సాధారాణ ప‌రిపాల‌న విభాగం ఓ నోటిఫికేష‌న్‌ను జారీ చేసింది. క‌రోనా కార‌ణంగా ప్ర‌భుత్వ కార్యాల‌యాల్లో సోమ‌వారం నుంచి శుక్ర‌వారం( ఐదు రోజుల విధుల‌) ప‌ని విధానాన్ని మార్చి 31, 2022 వ‌ర‌కు పొడిగిస్తున్న‌ట్లు ఆ నోటిఫికేష‌న్‌లో పేర్కొంది.

క‌రోనా సెకండ్ వేవ్ స‌మ‌యంలో ఐదు రోజుల పని విధానాన్ని మ‌ధ్య‌ప్ర‌దేశ్ ప్ర‌భుత్వం తీసుకువ‌చ్చింది. ఈ ఏడాది జూలై 22 నుంచి ఈ విధానాన్ని ప్ర‌వేశ‌పెట్టింది. అక్టోబ‌ర్ 31తో గ‌డువు ముగియ‌నున్న నేప‌థ్యంలో పొడిగిస్తూ నిర్ణ‌యం తీసుకుంది. ఇదిలా ఉంటే.. శుక్రవారం రాష్ట్రంలో 8 కేసులు మాత్ర‌మే నమోదయ్యాయి. మృతుల సంఖ్య కూడా 10,525 వద్దే నిలకడగా ఉంది. ఇంతవరకూ 7,82,126 మంది కోలుకోగా, కేవలం 80 యాక్టివ్ కేసులే ఉన్నట్టు ఆరోగ్య శాఖ ఓ అధికారిక ప్రకటనలో తెలిపింది.