మహారాష్ట్ర సీఎం ఎవరు? పవార్ ఢిల్లీ ప‌ర్య‌ట‌న‌.. షిండే అనారోగ్యంతో..

మహారాష్ట్రలో గత 10 రోజులుగా సీఎం పేరుపై ఉత్కంఠ నెలకొంది. మహారాష్ట్ర ఎన్నికల ఫలితాలు వచ్చి చాలా రోజులైంది. అయితే ఇప్పటి వరకు ముఖ్యమంత్రి పేరును ప్రకటించలేదు. ముంబై-ఢిల్లీ మధ్య జరుగుతున్న నిరంతర సమావేశాలను చూస్తుంటే.. మహారాష్ట్ర కొత్త ముఖ్యమంత్రి బీజేపీ నుంచి రావడం ఖాయం అని భావిస్తున్నారు, అయితే ఎవరనే విషయం ఇంకా వెల్లడి కాలేదు.

ఇదిలావుంటే.. ఏకనాథ్ షిండే విడుదల చేసిన అధికారిక ప్రకటన ప్రకారం.. ఆయ‌న‌ ఆరోగ్యం బాగా లేదు. షిండే గొంతు ఇన్ఫెక్షన్‌తో బాధపడుతున్నాడు. అనారోగ్యం కారణంగా.. ఏక్నాథ్ షిండే డిసెంబర్ 2న జరగాల్సిన అన్ని కార్యక్రమాలను కూడా రద్దు చేశారు. అదే సమయంలో, ప్రభుత్వ ఏర్పాటుకు సంబంధించి భారతీయ జనతా పార్టీ హైకమాండ్‌ను కలవడానికి నేషనలిస్ట్ కాంగ్రెస్ పార్టీ నాయకుడు అజిత్ పవార్ ఢిల్లీకి బయలుదేరారు.

మహారాష్ట్రలో సీఎం ప‌ద‌విపై కలకలం రేపుతున్న నేపథ్యంలో శివసేన నేత సంజయ్ శిర్సత్ నుంచి పెద్ద ప్రకటన వెలువడింది. మహాయుతి ప్రభుత్వం ఏర్పడుతుందని ఆయ‌న విలేకరుల సమావేశంలో చెప్పారు. మేము అడ్డంకి కాదు.. మాకు (శివసేన) ఎలాంటి డిమాండ్‌లు లేవని కూడా అన్నారు. ఇంత స్పష్టంగా చెప్పిన తర్వాత షిండేపై ఆరోపణలు చేయడం సరికాదన్నారు. సీనియర్ నేతలు ఎలాంటి నిర్ణయం తీసుకున్నా తాము అంగీకరిస్తామని శిర్సత్ తెలిపారు. మహాయుతిలో ఎలాంటి భిన్నాభిప్రాయాలు లేవు.. శాఖల విషయంలో నేతలు - ఏక్‌నాథ్ షిండే, దేవేంద్ర ఫడ్నవీస్, అజిత్ పవార్‌ల మధ్య సమావేశం జరిగి గందరగోళమంతా తొలగిపోతుందని భావిస్తున్నామ‌న్నారు.

ఇదిలావుండగా శివసేన ఎంపీ మిలింద్ దేవరా మాట్లాడుతూ.. మహాయుతికి నిర్ణయాత్మక ఆదేశం ఇచ్చినందుకు నేను మహారాష్ట్ర ప్రజలకు ముందుగా చెప్పాలనుకుంటున్నాను .. రాబోయే కొద్ది రోజుల్లో ప్రభుత్వాన్ని ఏర్పాటు చేస్తామని వారికి హామీ ఇస్తున్నాను. బలమైన ప్రభుత్వం, సుస్థిర ప్రభుత్వం ఏర్పాటు చేసేందుకు మిత్రపక్షాలన్నీ కలిసి పనిచేస్తాయని, ముంబై, మహారాష్ట్ర ప్ర‌జ‌లు ముందుకు సాగేలా చూస్తామని ఆయన అన్నారు. (ఏకనాథ్) షిండే సాహెబ్.. నేను చూసిన దాని ప్రకారం, ఆయ‌న సంకీర్ణ ధర్మాన్ని నమ్ముతార‌న్నారు. కూటమి ధర్మాన్ని కాపాడుకుంటూ మా మిత్రపక్షాలందరితో కలిసి పనిచేస్తామన్నారు. మహారాష్ట్ర ప్రజలకు న్యాయం చేయడమే మా లక్ష్యం తప్ప కుర్చీ కోసం రాజకీయాలు చేయడం కాదన్నారు.

మహారాష్ట్ర ఉపముఖ్యమంత్రి పదవికి తన అభ్యర్థిత్వంపై ఊహాగానాల మధ్య ఏక్నాథ్ షిండే కుమారుడు శ్రీకాంత్ షిండే సోమవారం మాట్లాడుతూ.. "తనకు ఎలాంటి కోరిక లేదు" అని, తాను రాష్ట్రంలో ఏ మంత్రి పదవికి రేసులో లేనని అన్నారు.

సీఎం షిండేతో పాటు ఆయన నేతృత్వంలోని గత ప్రభుత్వంలో డిప్యూటీ సీఎంలుగా ఉన్న దేవేంద్ర ఫడ్నవీస్, అజిత్ పవార్‌లను బీజేపీ నాయకత్వం ఢిల్లీకి పిలిపించింది. ఏక్‌నాథ్ షిండే, ఫడ్నవీస్, అజిత్ పవార్ ఢిల్లీ చేరుకుని బీజేపీ అధ్యక్షుడు జేపీ నడ్డా, హోంమంత్రి అమిత్ షాతో సమావేశమయ్యారు. అమిత్ షా నివాసంలో మూడు గంటలపాటు సమావేశమైన అనంతరం ముగ్గురు నేతలు అదే రోజు రాత్రి ముంబైకి తిరిగి వచ్చారు. ముంబైలో మహాయుతి నాయకుల సమావేశం జరగాల్సి ఉంది, అయితే ఏకనాథ్ షిండే సతారా జిల్లాలో ఉన్న తన స్వగ్రామానికి వెళ్లి రెండు రోజులుగా అక్కడే ఉన్నారు. దీంతో మహాయుతి నేతల సమావేశం ఆలస్యమవుతోంది.