కళ్యాణ్‌ జ్యువెలర్స్‌లో పేలిన ఎయిర్‌ కండీషనర్, ముగ్గురికి తీవ్ర గాయాలు

కర్ణాటకలోని కళ్యాణ్ జ్యువెలర్స్‌లో ఎయిర్‌ కండీషనర్‌ పేలిపోయింది. ఈ సంఘటనలో ముగ్గురికి తీవ్ర గాయాలు అయ్యాయి. వెంటనే స్పందించిన ఇతర సిబ్బంది, స్థానికులు వారిని ఆస్పత్రికి తరలించారు. ప్రస్తుతం వారు ఆస్పత్రిలో చికిత్స పొందుతున్నట్లు తెలిపారు.

ప్రస్తుతం దేశవ్యాప్తంగా ఎండలు దంచి కొడుతున్నాయి. ఈ నేపథ్యంలో ఆయా దుకాణాలు.. ఆఫీసుల్లో ఎయిర్‌ కండీషనర్లను ఆన్‌ చేస్తున్నారు. ఎండ ఉక్కపోత నుంచి తప్పించుకునేందుకు.. కస్టమర్స్‌ను ఇంకాసేపు చల్లదనంలోనే ఉంచేందుకు ఆయా వ్యాపారులు ఏసీలను వినియోగిస్తుంటారు కూడా. అయితే.. కర్ణాటక బళ్లారిలోని కళ్యాణ్‌ జ్యువెలర్స్‌ స్టోర్‌లో ఉన్నట్లుండి ఎయిర్ కండీషనర్‌ పేలిపోయింది. దాంతో.. కొంత మేర మంటలు వ్యాపించాయి. షోరూం మొత్తం పూర్తిగా పొగను అలుముకుంది. ఈ సంఘటనలో ముగ్గురికి తీవ్ర గాయాలు అయ్యాయి. గురువారం సాయంత్రం ఈ పేలుడు జరిగింది.

దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. ఆ వీడియోలో స్టోర్‌ మరియు చుట్టుపక్కల ఉన్న కిటికీలు పగిలిపోయినట్లు కనిపిస్తోంది. మంటలు అంటుకోవడం వల్ల కొందరికి గాయాలు అయినట్లు కనిపిస్తోంది. పరిస్థితి విషమంగా ఉన్న ముగ్గురిని స్థానిక ఆస్పత్రికి తరలించారు. ఇక ఈ సంఘటన గురించి తెలుసుకున్న పోలీసులు, ఫైరింజన్ సిబ్బంది వెంటనే అక్కడికి చేరుకున్నారు. మంటలను ఆర్పేశారు. ఇక నగల షోరూంలో ఎయిర్‌ కండీషనర్‌ పేలిన సంఘటన స్థానికంగా కలకలం రేపుతోంది. ఒక ఎయిర్‌ కండిషనర్‌లో ఒకటి పనిచేయకపోవడం వల్లే ఈ ప్రమాదం సంభవించి ఉంటుందని అంచనా వేస్తున్నారు. దీనిపై కేసు నమోదు చేశామనీ.. దర్యాప్తు తర్వాత అన్ని విషయాలను వెల్లడిస్తామని పోలీసులు తెలిపారు.