రష్యా చమురు కొనుగోళ్లను భారత్‌ నిలిపివేసిందని వార్తలు.. ఖండించిన ప్రభుత్వ వర్గాలు

ప్రభుత్వ ఆధీనంలో ఉన్న భారత చమురు కంపెనీలు రష్యా నుండి ముడి చమురు కొనుగోళ్లను నిలిపివేసినట్లు నివేదికలు వచ్చిన ఒక రోజు తర్వాత, ప్రభుత్వ వర్గాలు ఆ వాదనలను తోసిపుచ్చాయి. భారతదేశ ఇంధన దిగుమతులు మార్కెట్ డైనమిక్స్, జాతీయ ప్రయోజనాల ద్వారా మార్గనిర్దేశం చేయబడతాయని ప్రభుత్వ వర్గాలు పునరుద్ఘాటించాయి. రష్యా చమురు కొనుగోళ్లను నిలిపివేసినట్లు వచ్చిన వార్తలను అమెరికా అధ్యక్షుడు డొనాల్డ్ ట్రంప్ స్వాగతిస్తూ, దీనిని "గుడ్‌ స్టెప్‌" అని అభివర్ణించిన నేపథ్యంలో ఈ వ్యాఖ్య వచ్చింది. "దేశం యొక్క ఇంధన కొనుగోళ్లు మార్కెట్ శక్తులు, జాతీయ ప్రయోజనాల ద్వారా నడపబడుతున్నాయని, భారత చమురు సంస్థలు రష్యన్ దిగుమతులను నిలిపివేసినట్లు తమకు ఎటువంటి నివేదికలు లేవని ప్రభుత్వ వైఖరిని నిన్న (శుక్రవారం) స్పష్టం చేశారు" అని వర్గాలు తెలిపాయి.

భారతదేశం సముద్రం ద్వారా రష్యా ముడి చమురును ఎక్కువగా కొనుగోలు చేసే దేశం అని, గత వారం రోజులుగా ఆ దేశ ప్రభుత్వ చమురు శుద్ధి సంస్థలు - ఇండియన్ ఆయిల్ కార్ప్, హిందూస్తాన్ పెట్రోలియం, భారత్ పెట్రోలియం, మంగళూరు రిఫైనరీ పెట్రోకెమికల్ లిమిటెడ్ - రష్యన్ చమురును కోరలేదని నివేదిక పేర్కొంది. రష్యా చమురు కొనుగోలును కొనసాగిస్తున్న దేశాలపై అమెరికా భౌగోళిక రాజకీయ ఒత్తిడిని పెంచడంతో ఇది జరిగిందని అంతర్జాతీయ కథనాలు పేర్కొన్నాయి.

ప్రపంచ ఆర్థిక వ్యవస్థలో మార్పులు, అమెరికా అధ్యక్షుడు డొనాల్డ్ ట్రంప్ బెదిరింపుల మధ్య భారతదేశ ఇంధన అవసరాలపై అడిగిన ప్రశ్నకు విదేశాంగ మంత్రిత్వ శాఖ ప్రతినిధి రణ్‌దీప్ జైస్వాల్ స్పందిస్తూ, ఈ విషయంలో భారతదేశ వైఖరి స్పష్టంగా ఉందని, మార్కెట్ గతిశీలత, జాతీయ ప్రయోజనాల ద్వారా ఇది మార్గనిర్దేశం చేయబడుతుందని అన్నారు. మాస్కోతో న్యూఢిల్లీకి ఉన్న దీర్ఘకాల సంబంధాలను ప్రభుత్వం సమర్థించింది, దీనిని 'కాలపరీక్షించబడిన భాగస్వామ్యం'గా అభివర్ణించింది, అదే సమయంలో భారతదేశం-అమెరికా సంబంధాల బలాన్ని కూడా పునరుద్ఘాటించింది.

"భారతదేశం మరియు రష్యా స్థిరమైన మరియు కాలపరీక్షించబడిన భాగస్వామ్యాన్ని పంచుకుంటున్నాయి" అని జైస్వాల్ అన్నారు. ప్రస్తుత ఉద్రిక్తతలు ఉన్నప్పటికీ అమెరికాతో ద్వైపాక్షిక సంబంధాలు ముందుకు సాగుతాయని విశ్వాసం వ్యక్తం చేశారు.