హర్యానా ఐపీఎస్‌ ఆత్మహత్య, డీజీపీని సెలవుపై పంపిన ప్రభుత్వం

హర్యానా ఐపీఎస్ అధికారి వై. పురాణ్ కుమార్ ఆత్మహత్య కేసులో కీలక నిందితుడిపై చర్యలు తీసుకోవాలనే డిమాండ్ మధ్య , హర్యానా ప్రభుత్వం డైరెక్టర్ జనరల్ ఆఫ్ పోలీస్ (డిజిపి) శత్రుజీత్ కపూర్‌ను సెలవుపై పంపింది. ఓం ప్రకాష్ సింగ్‌కు అదనపు బాధ్యత అప్పగించారు. పురాణ్ కుమార్ ఆత్మహత్య బిజెపి ప్రభుత్వంపై ప్రతిపక్షాలు దాడి చేయడం, ఆయనను వేధించిన అధికారులపై చర్యలు తీసుకోవాలని కుమార్ కుటుంబం డిమాండ్ చేయడంతో హర్యానా ప్రభుత్వం రాష్ట్ర డిజిపి శత్రుజీత్ కపూర్‌ను సెలవుపై పంపింది. అక్టోబర్ 14న హర్యానా ప్రభుత్వ హోం శాఖ ఉత్తర్వు ప్రకారం, శత్రుజీత్ సింగ్ కపూర్ సెలవు కాలంలో ప్రస్తుతం హర్యానా పోలీస్ హౌసింగ్ కార్పొరేషన్ మేనేజింగ్ డైరెక్టర్‌గా ఉన్న ఓం ప్రకాశ్ సింగ్, ఐపీఎస్‌కు డిజిపి అదనపు బాధ్యతను అప్పగించారు.

2001 బ్యాచ్ ఇండియన్ పోలీస్ సర్వీస్ (ఐపీఎస్) అధికారి అయిన యాభై రెండేళ్ల కుమార్ అక్టోబర్ 7న తనను తాను కాల్చుకుని చనిపోయాడని ఆరోపణలు ఉన్నాయి. ఎఫ్ఐఆర్ నమోదు చేసిన తర్వాత, ఈ కేసుపై "త్వరిత, నిష్పాక్షిక మరియు సమగ్ర దర్యాప్తు" కోసం చండీగఢ్ పోలీసులు ఆరుగురు సభ్యుల ప్రత్యేక దర్యాప్తు బృందాన్ని ఏర్పాటు చేశారు. ఈ కేసును న్యాయంగా, నిష్పాక్షికంగా, పారదర్శకంగా దర్యాప్తు చేస్తున్నామని, అన్ని కోణాల్లోనూ సిట్ దర్యాప్తు చేస్తోందని చండీగఢ్ పోలీసులు సోమవారం తెలిపారు. కాగా పురాణ్‌కుమార్ తన సూసైడ్‌ నోట్‌లో.. డీజీపీ శత్రుజీత్ కపూర్‌తో సహా ఎనిమిది మంది సీనియర్ పోలీసు అధికారులపై "స్పష్టమైన కుల వివక్ష, లక్ష్యంగా చేసుకున్న మానసిక వేధింపులు, బహిరంగ అవమానం మరియు దౌర్జన్యాలు" ఆరోపణలు చేశారు.