RAW కొత్త చీఫ్‌గా సీనియర్ ఐపీఎస్ అధికారి రవి సిన్హా
Govt appoints IPS officer Ravi Sinha as RAW chief. రీసెర్చ్ అండ్ అనాలిసిస్ వింగ్ (RA&W) కొత్త చీఫ్‌గా ఐపీఎస్ అధికారి రవి సిన్హా నియమితులయ్యారు.
By Medi Samrat Published on 19 Jun 2023 11:45 AM GMT
రీసెర్చ్ అండ్ అనాలిసిస్ వింగ్ (RA&W) కొత్త చీఫ్‌గా ఐపీఎస్ అధికారి రవి సిన్హా నియమితులయ్యారు. ఐపీఎస్ అధికారి రవి సిన్హా జూన్ 30న బాధ్యతలు స్వీకరించనున్నారు. ఈ మేరకు సోమవారం అధికారులు సమాచారం అందించారు. ప్రస్తుతం సమంత్ గోయల్.. రా(RAW) చీఫ్‌గా ఉన్నారు. భారత గూఢచార సంస్థ RAW కొత్త చీఫ్‌గా సీనియర్ ఐపీఎస్ అధికారి రవి సిన్హా సోమవారం నియమితులైనట్లు సిబ్బంది మంత్రిత్వ శాఖ ఉత్తర్వుల్లో పేర్కొంది.
1988 బ్యాచ్ ఇండియన్ పోలీస్ సర్వీస్ (IPS) ఛత్తీస్‌గఢ్ కేడర్ అధికారి అయిన రవి సిన్హా.. ప్రస్తుతం క్యాబినెట్ సెక్రటేరియట్‌లో ప్రత్యేక కార్యదర్శిగా పనిచేస్తున్నారు. రవి సిన్హాను RAW కొత్త చీఫ్‌గా రెండేళ్ల పదవీకాలానికి నియమించేందుకు కేబినెట్ నియామకాల కమిటీ ఆమోదం తెలిపిందని మంత్రిత్వ శాఖ ఉత్తర్వుల్లో పేర్కొంది. జూన్ 30, 2023న సమంత్ కుమార్ గోయెల్ పదవీకాలం పూర్తికానుండ‌టంతో ఆయ‌న స్థానంలో రవి సిన్హా నియామ‌కం జ‌రిగింది.
