ఐఎన్‌ఎస్‌ విక్రమాదిత్యలో అగ్ని ప్రమాదం

ఎయిర్‌క్రాఫ్ట్ క్యారియర్ ఐఎన్‌ఎస్ విక్రమాదిత్య నౌకలో అగ్ని ప్రమాదం చోటు చేసుకుంది. కర్ణాటకలోని కార్వార్‌లో 18 నెలల రీఫిట్‌ - కమ్‌ - మెయింటెనెన్స్‌ తర్వాత సముద్రంలో ట్రయల్స్‌ నిర్వహిస్తుండగా నౌకలో మంటలు చెలరేగాయని అధికారులు తెలిపారు. మంటలను గమనించిన ఓడ సిబ్బంది వెంటనే ఓడలోని అగ్నిమాపక వ్యవస్థలను ఉపయోగించి అగ్నిమాపక చర్యలు చేపట్టారు. తర్వాత మంటలను అదుపులోకి తీసుకొచ్చారు. బుధవారం సాయంత్రం ఈ ఘటన చోటు చేసుకుంది.

''ఈ ఘటనలో ఎలాంటి ప్రాణనష్టం జరగలేదు. ఈ ఘటనపై విచారణకు భారత నౌకాదళం విచారణ బోర్డును ఏర్పాటు చేసింది. ఓడకు ఎంత మేరకు మంటలు లేదా నష్టం వాటిల్లింది అనే వివరాలు ఇంకా తెలియరాలేదు.'' అని ఇండియన్‌ నేవీ బుధవారం అర్ధరాత్రి ఓ ప్రకటనలో తెలిపింది. 2019 ఏప్రిల్‌లో ఈ విమాన వాహక నౌకలో మంటలు చెలరేగడంతో యువ నౌకాదళ అధికారి మరణించారు. గతేడాది మేలో కూడా ఐఎన్‌ఎస్ విక్రమాదిత్య విమానంలో స్వల్ప అగ్నిప్రమాదం జరిగింది. భారత నౌకాదళం తన రెండవ విమాన వాహక నౌక ఐఎన్‌ఎస్ విక్రాంత్‌ను వచ్చే నెలలో ప్రారంభించనుంది.