విజిల్‌ మింగిన నాలుగేళ్ల చిన్నారి.. గంటసేపు ఆపరేషన్‌ చేయడంతో..

ప్రమాదవశాత్తు తన షూలో అమర్చిన 1.8 సెంటీమీటర్ల పొడవు గల విజిల్‌ ఉడిపోవడంతో, దానిని తీసుకుని మింగిన నాలుగేళ్ల బాలుడికి ఢిల్లీలోని ఎయిమ్స్‌లో వైద్యులు విజయవంతంగా శస్త్రచికిత్స చేశారు. హర్యానాకు చెందిన బాలుడు తాను ధరించిన షూ నుండి విజిల్ విడిపోవడంతో దానిని మింగేశాడు. తోబుట్టువులతో ఆడుకుంటూ దాన్ని మింగేశాడు. విజిల్ మింగిన వెంటనే, బాలుడు దగ్గు ప్రారంభించాడు. అది అతని కుడి శ్వాసనాళంలో ఇరుక్కుపోయి, ఊపిరి పీల్చుకోలేకపోయాడు. అతని తల్లిదండ్రులు అతన్ని ఎయిమ్స్‌కు తరలించారు. ఆసుపత్రి వైద్యులు బాలుడికి కనీసం గంటసేపు శస్త్రచికిత్స చేసి అతని శరీరం నుండి విజిల్ వెలికితీశారు.

ఎయిమ్స్‌ డైరెక్టర్‌ డాక్టర్‌ ఎం శ్రీనివాస్‌, డాక్టర్‌ మిను బాజ్‌పాయ్‌, డాక్టర్‌ ప్రబుద్‌ గోయెల్‌తో కూడిన వైద్యుల బృందం 60 నిమిషాల పాటు శస్త్రచికిత్స నిర్వహించారు. "అతను బాగా దగ్గుతున్నాడు, శ్వాస తీసుకోవడంలో ఇబ్బంది పడ్డాడు, అతను దగ్గుతున్నప్పుడు, అతను తన ఊపిరితిత్తులలో చిక్కుకున్న విజిల్ నుండి వెలువడే విజిల్ శబ్దాలను కూడా ఉత్పత్తి చేస్తున్నాడు" అని పీడియాట్రిక్ సర్జరీ విభాగంలో అసిస్టెంట్ ప్రొఫెసర్ డాక్టర్ గోయెల్ చెప్పారు. తల్లిదండ్రులు తమ పిల్లలకు ఇచ్చే బొమ్మలను లేదా ఆహార పదార్థాలను మింగడం, అది వారి గొంతులో కూరుకుపోయిన ఘటనలు చాలా చోటు చేసుకుంటున్నాయి. ఢిల్లీ ఎయిమ్స్‌లో ప్రతి సంవత్సరం ఇలాంటి 100 కేసులు నమోదవుతున్నాయని వైద్యులు తెలిపారు.

"బాలుడు విజిల్ మింగాడని నా కూతురు నాకు తెలియజేసింది. వాంతి చేసుకునేందుకు అతని వీపు మీద తట్టాను.. వాంతి చేసుకున్నాడు, కానీ విజిల్ బయటకు రాలేదు" అని బాలుడి తల్లి చెప్పింది. ఒకటి నుంచి మూడేళ్లలోపు పిల్లలకు ప్రాణహాని కలిగించే వాటిని ఎక్కువగా మింగే అవకాశం ఉన్నందున తల్లిదండ్రులు జాగ్రత్తగా వ్యవహరించాలని వైద్యులు తెలిపారు. వైద్యుల అభిప్రాయం ప్రకారం.. చిన్నారిని ఆసుపత్రికి తరలించలేకపోతే ఈ సంఘటన ప్రాణాంతకంగా మారే అవకాశం ఉంది. వేరుశెనగలు, నెక్లెస్ పూసలు, పొడి బ్యాటరీలు, బొమ్మలలో అమర్చిన చిన్న భాగాలు మొదలైన చిన్న వస్తువులను ఖచ్చితంగా పిల్లలకు అందుబాటులో లేకుండా ఉంచాలని వైద్యులు చెప్పారు.