ఆన్‌లైన్‌లో గేదెను ఆర్డర్ చేశాడు.. రూ.40వేలు మోసపోయాడు..!
ఆన్లైన్ షాపింగ్‌లో అనేక మోసాలు వెలుగులోకి వచ్చాయి. అయితే గేదెల కొనుగోలులో మోసం జరిగిన సంఘటనలు చాలా అరుదు.
By Kalasani Durgapraveen Published on 7 Nov 2024 6:51 AM GMT
ఆన్లైన్ షాపింగ్‌లో అనేక మోసాలు వెలుగులోకి వచ్చాయి. అయితే గేదెల కొనుగోలులో మోసం జరిగిన సంఘటనలు చాలా అరుదు. ఓ వ్యక్తి ఆన్‌లైన్‌లో గేదె కొనుగోలు పేరుతో రూ.40 వేలు మోసపోయాడు. ఉత్త‌ర‌ప్ర‌దేశ్ రాష్ట్రం దేవా పోలీస్ స్టేషన్‌లోని సఫీపూర్ గ్రామానికి చెందిన రాంలాఖాన్ 2024 నవంబర్ 4న ఉదయం 10 గంటలకు మొబైల్ నంబర్ 8757781507కు కాల్ చేశాడు.
ఆరావళి డెయిరీ ఫామ్‌కు చెందిన సోను కుమార్ నుండి రూ.65 వేలకు గేదెను ఆన్‌లైన్‌లో కొనుగోలు చేసేందుకు ఒప్పందం కుదిరింది. ఇందులో రాంలాఖాన్ నుంచి రూ.7వేలు ఆన్లైన్ అడ్వాన్స్‌గా ఇచ్చారని.. గేదెను ఇంటికి చేర్చిన తర్వాత మిగిలిన రూ.58వేలు చెల్లించాలని కోరారు. ఆన్లైన్ డీల్స్ చేస్తున్న నిందితుడు సోను కుమార్ తన పేరు, చిరునామా, ఆధార్, పాన్ కార్డ్, మొబైల్ బార్ కోడ్‌ను పంపాడని రాంలాఖన్ పోలీసులకు చెప్పాడు. అంతే కాదు.. డెలివరీ డ్రైవర్‌ను మొబైల్ నంబర్ 7372023853లో తనతో మాట్లాడేలా చేశాడు. దీంతో రామ్లాఖాన్ మోసగాడిని నమ్మి అతని మాయ‌లో ప‌డిపోయాడు.
ఇది జరిగిన తర్వాత మరుసటి రోజు నవంబర్ 5న సోను ఫోన్ చేసి ఇచ్చిన మొబైల్ బార్ కోడ్‌పై రూ.16,500 పంపాలని కోరాడు. తనకు పూర్తి నమ్మకం క‌ల‌గ‌డంతో సోనూకు రూ.16,500 పంపాడు. కొంత సమయం తర్వాత సోనూ మళ్లీ రూ.16 వేల 500 అడిగాడు. రాంలాఖాన్ మళ్లీ పంపించాడు. ఆ తర్వాత మిగిలిన రూ.25 వేలు ఇవ్వాలని సోనూ పదే పదే డిమాండ్ చేయడం ప్రారంభించాడు. దీంతో రాంలాఖాన్ డెలివరీ తర్వాత డబ్బులు ఇస్తాన‌ని చెప్ప‌గా.. గేదెను పంపేందుకు నిందితులు స్పష్టంగా నిరాకరించడంతో రూ.40 వేలు మోసపోయినట్లు గ్ర‌హించాడు.
బుధవారం బాధితుడు పోలీసు సూపరింటెండెంట్‌ను కలుసుకుని విష‌యం మొత్తం వివరించాడు. మోసగాడు పంపిన వివరాలన్నింటినీ చూపించాడు. ఈ ఘటనపై కేసు నమోదు చేయాలని ఆదేశించినట్లు ఎస్పీ దినేష్ కుమార్ సింగ్ తెలిపారు.
