వినేష్‌ కాంగ్రెస్‌లో చేరడంపై బబితా ఫోగట్ సంచలన వ్యాఖ్యలు

తన బంధువు వినేష్ ఫోగట్ ఇటీవల గ్రాండ్ ఓల్డ్ పార్టీలో చేరిన తర్వాత కాంగ్రెస్ సీనియర్ నేత భూపిందర్ సింగ్ హుడా తన కుటుంబంలో చీలికను సృష్టించారని రెజ్లర్, బీజేపీ నాయకురాలు బబితా ఫోగట్ ఆరోపించారు. మంగళవారం మీడియాతో బీజేపీ నాయకురాలు బబితా ఫోగట్ మాట్లాడుతూ.. కాంగ్రెస్‌లో చేరి వినేష్ తొందరపాటు నిర్ణయం తీసుకున్నారని అన్నారు.

భూపీందర్ హుడా ఫోగట్ తమ కుటుంబంలో చీలికను సృష్టించడంలో విజయం సాధించారని, ప్రజలు అతనికి గుణపాఠం చెబుతారని, విభజించి పాలించడమే కాంగ్రెస్ ఎజెండా అని, కుటుంబాలను విచ్ఛిన్నం చేయడమే లక్ష్యంగా పనిచేశారని బబితా ఫోగట్ అన్నారు. వినేష్ తన తండ్రి, వినేష్ మేనమామ అయిన మహావీర్ ఫోగట్ మాటలను వినవలసి ఉండాల్సిందని చెప్పారు. "మహావీర్ ఫోగట్ వినేష్ గురువు. ఆమె తన గురువుకు లోబడి ఉండాలి. గురువు సరైన మార్గాన్ని చూపుతారు" అని బబిత చెప్పారు.

పారిస్ ఒలింపిక్స్‌లో పతకాన్ని కోల్పోయిన వినేష్ ఫోగట్ తన రెజ్లింగ్ కెరీర్‌పై దృష్టి పెట్టాల్సి ఉందని, ఆమె 2028లో ఒలింపిక్ స్వర్ణం సాధించే అవకాశం ఉందని బిజెపి నాయకురాలు అన్నారు.

సెప్టెంబర్ 6న రెజ్లర్లు వినేష్ ఫోగట్, బజరంగ్ పునియా కాంగ్రెస్‌లో చేరారు. అక్టోబర్ 5న జరగనున్న హర్యానా అసెంబ్లీ ఎన్నికలకు జులనా నియోజకవర్గం నుంచి వినేష్‌ను పార్టీ బరిలోకి దింపింది. బిజెపి మాజీ ఎంపి, మాజీ రెజ్లింగ్ ఫెడరేషన్ ఆఫ్ ఇండియా చీఫ్ బ్రిజ్ భూషణ్ శరణ్ సింగ్‌పై ఆమె, ఇతర రెజ్లర్లు గత సంవత్సరం నిరసన వ్యక్తం చేసిన తర్వాత వినేష్ ఫోగట్ బిజెపిని విమర్శించారు . అతను పలువురు యువ జూనియర్ రెజ్లర్లను వేధిస్తున్నాడని రెజ్లర్లు ఆరోపించారు.

2019లో బీజేపీలో చేరిన బబితా ఫోగట్‌ను హర్యానా ఎన్నికలకు పార్టీ అభ్యర్థిగా పేర్కొనలేదు. అయితే, ‘వ్యక్తి కంటే పార్టీ పెద్దది, పార్టీ కంటే దేశం పెద్దది’ అంటూ బీజేపీ నిర్ణయానికి ఆమె మద్దతు పలికారు. "నేను బిజెపి అగ్ర నాయకత్వం నిర్ణయానికి కట్టుబడి ఉన్నాను. అంకితభావంతో కూడిన పార్టీ కార్యకర్తగా, సంస్థ ఇచ్చిన ప్రతి బాధ్యతను నిర్వర్తిస్తూనే ఉంటాను" అని ఆమె అన్నారు.