ప్రతిపక్ష ఎంపీల ఫోన్లు హ్యాక్.. థ్రెట్ అలర్ట్‌ నోటిఫికేషన్లు పంపిన యాపిల్‌!
ఎంపీ అసదుద్దీన్ ఒవైసీ, ఇతర ప్రతిపక్ష నేతలు తమ ఫోన్లు హ్యాకింగ్‌కు గురయ్యాయని ఆరోపించారు. వారు యాపిల్‌ ముప్పు నోటిఫికేషన్‌ల స్క్రీన్‌షాట్‌లను పంచుకున్నారు.
By అంజి Published on 31 Oct 2023 8:13 AM GMT
ప్రతిపక్ష ఎంపీల ఫోన్లు హ్యాక్.. థ్రెట్ అలర్ట్‌ నోటిఫికేషన్లు పంపిన యాపిల్‌!
హైదరాబాద్ ఎంపీ, ఏఐఎంఐఎం అధ్యక్షుడు అసదుద్దీన్ ఒవైసీ, ఇతర ప్రతిపక్ష నేతలు తమ ఫోన్లు హ్యాకింగ్‌కు గురయ్యాయని ఆరోపించారు. వారు యాపిల్‌ ముప్పు నోటిఫికేషన్‌ల స్క్రీన్‌షాట్‌లను పంచుకున్నారు. హెచ్చరిక యొక్క స్క్రీన్‌షాట్‌ను పంచుకుంటూ, ఒవైసీ ఇలా వ్రాశారు.. ''దాడి చేసేవారు నా ఫోన్‌ను లక్ష్యంగా చేసుకోవచ్చని గత రాత్రి ఆపిల్ థ్రెట్ నోటిఫికేషన్ వచ్చింది'' అని ఎక్స్‌లో రాశారు.
కేంద్రం తన ఫోన్ హ్యాక్ చేసేందుకు ప్రయత్నిస్తోందని టీఎంసీ ఎంపీ మహువా మొయిత్రా ఆరోపించారు. తన ఐఫోన్‌కు అలర్ట్‌లు వచ్చాయంటూ స్క్రీన్‌ షాట్లను సోషల్‌ మీడియాలో షేర్‌ చేశారు. అందానీ, కేంద్రం భయం చూస్తుంటే జాలి వేస్తోందన్నారు. శివసేన ఎంపీ ప్రియాంక చతుర్వేది సహా ఇండియా కూటమిలో ఉన్న మరో ముగ్గురికీ ఈ అలర్ట్‌లు వచ్చాయన్నారు. కాగా లోక్‌సభలో ప్రశ్నించేందుకు లంచం తీసుకున్నారని మొయిత్రా ఆరోపణలు ఎదుర్కొంటున్నారు.
విపక్ష నేతల ఫోన్లు ట్యాపింగ్‌ అవుతున్నాయని కాంగ్రెస్ అగ్రనేత రాహుల్ గాంధీ సంచలన ఆరోపణలు చేశారు. ఇలాంటి విషయాలకు తాము భయపడేది లేదని స్పష్టం చేశారు. కాగా, తమ ఫోన్లు హ్యాక్ అయినట్లు యాపిల్‌ నుంచి సమాచారం అందిందని పలువురు ప్రతిపక్ష నేతలు చెబుతున్నారు. ఈ అంశంపై సమాధానం చెప్పాలని వారు కేంద్రాన్ని డిమాండ్‌ చేస్తున్నారు.
కాంగ్రెస్ నాయకుడు శశి థరూర్ ఎక్స్‌లో పోస్ట్ చేస్తూ.. ''నేను ధృవీకరించిన Apple ID, threat-notifications@apple.com నుండి వచ్చింది. ప్రామాణికత నిర్ధారించబడింది. నాలాంటి పన్నుచెల్లింపుదారుల ఖర్చులతో నిరుద్యోగ అధికారులను బిజీగా ఉంచడం ఆనందంగా ఉంది! ఇంతకంటే ముఖ్యమైనది ఏమీ లేదు?'' అని రాశారు.
మరో కాంగ్రెస్ నాయకుడు, పార్టీ ప్రతినిధి పవన్ ఖేరా.. "ప్రియమైన మోడీ సర్కార్, మీరు ఎందుకు ఇలా చేస్తున్నారు?" అని హెచ్చరిక సైన్ స్క్రీన్‌షాట్‌ను ఎక్స్‌లో పోస్ట్ చేశారు. శివసేన (యూబీటీ) నేత ప్రియాంక చతుర్వేది, సమాజ్‌వాదీ పార్టీ (ఎస్పీ) అధినేత అఖిలేష్ యాదవ్, ఆమ్ ఆద్మీ పార్టీ (ఆప్) నాయకుడు రాఘవ్ చద్దా, సీపీఎం ప్రధాన కార్యదర్శి సీతారాం ఏచూరితో సహా ప్రతిపక్ష భారత కూటమికి చెందిన ఇతర నాయకులు, కాంగ్రెస్ ఎంపీ రాహుల్ గాంధీ కార్యాలయంలోని మరికొందరికి కూడా ఆపిల్ నుండి హెచ్చరిక సందేశాలు వచ్చాయి.
Apple వెబ్‌సైట్ సపోర్ట్ పేజీ ప్రకారం, ఎంపీల యాపిల్‌ ఐడీ ఆధారంగా స్టేట్‌ స్పాన్సర్డ్‌ అటాకర్స్‌ తమ ఐఫోన్‌, ఈ-మెయిల్స్‌ హ్యాక్ చేస్తున్నట్లు హెచ్చరించింది. వ్యక్తిగత సమాచారాన్ని దొంగలించే ప్రమాదం ఉందని, జాగ్రత్తగా ఉండాలని సూచించింది.
