విషాదం.. గోడకూలి 9 మంది చిన్నారులు మృతి.. ఇద్దరికి తీవ్ర గాయాలు

మధ్యప్రదేశ్‌లోని సాగర్ జిల్లాలో ఆదివారం శిథిలావస్థలో ఉన్న ఇంటి గోడ కూలి తొమ్మిది మంది చిన్నారులు మృతి చెందగా, మరో ఇద్దరు గాయపడినట్లు సీనియర్ అధికారి తెలిపారు. అధికారులు తెలిపిన వివరాల ప్రకారం.. ఈ సంఘటన ఉదయం 8.30 - 9 గంటల మధ్య రెహ్లీ అసెంబ్లీ సీటు పరిధిలోని షాపూర్ గ్రామంలో ఒక మతపరమైన కార్యక్రమంలో ఆలయ ప్రాంగణం సమీపంలో జరిగింది.

ఇప్పటివరకు అందిన సమాచారం ప్రకారం షాపూర్‌లో జరిగిన మతపరమైన కార్యక్రమంలో గోడ కూలిన ఘటనలో 10 నుంచి 15 ఏళ్లలోపు తొమ్మిది మంది చిన్నారులు మృతి చెందారని, ఇద్దరు గాయపడ్డారని సాగర్ డివిజనల్ కమిషనర్ వీరేంద్ర సింగ్ రావత్ ఫోన్‌లో పిటిఐకి తెలిపారు.

జిల్లా కలెక్టర్‌తోపాటు ఉన్నతాధికారులు ఘటనా స్థలానికి చేరుకున్నారు. ఈ ఘటనపై ముఖ్యమంత్రి మోహన్ యాదవ్ విచారం వ్యక్తం చేస్తూ, మృతుల కుటుంబాలకు రూ.4 లక్షల ఆర్థిక సాయం ప్రకటించారు. శిథిలావస్థలో ఉన్న ఇంటి సమీపంలో ఒక టెంట్ కింద "పార్థివ్ శివలింగ్ నిర్మాణ్" (మట్టితో శివలింగాన్ని తయారు చేయడం) కార్యక్రమం జరుగుతుండగా, గోడ కూలిపోయి టెంట్‌పై పడిందని స్థానిక బిజెపి ఎమ్మెల్యే, మాజీ మంత్రి గోపాల్ భార్గవ విలేకరులతో అన్నారు.

పిల్లలు డేరా, శిథిలాల కింద నలిగిపోయారని తెలిపారు. మృతుల్లో పలువురు తమ తల్లిదండ్రులకు ఏకైక సంతానం అని భార్గవ తెలిపారు. జిల్లా కలెక్టర్ దీపక్ ఆర్య మాట్లాడుతూ.. పిల్లలు గుడి దగ్గర టెంట్ కింద కూర్చున్నారని, వర్షం కారణంగా ఇంటి గోడ కూలిపోయిందని తెలిపారు.

ఇద్దరు చిన్నారులు అక్కడికక్కడే మృతి చెందగా, మరో ఏడుగురు ఆస్పత్రికి తరలించేలోపే మృతి చెందారని ఆయన తెలిపారు. ఈ ఘటనలో మరో ఇద్దరు చిన్నారులు గాయపడి జిల్లా ఆసుపత్రిలో చికిత్స పొందుతున్నారని ఆర్య తెలిపారు. వారు ప్రమాదం నుంచి బయటపడ్డారని ఆయన తెలిపారు.

అధికారుల ప్రకారం మృతులను ధ్రువ్ యాదవ్ (12), నితేష్ పటేల్ (13), అశుతోష్ ప్రజాపతి (15), ప్రిన్స్ సాహు (12), పర్వ్ విశ్వకర్మ (10), దివ్యాంష్ సాహు (12), దేవ్ సాహు (12), వంశ్ లోధి(10) , హేమంత్ (10) గుర్తించారు.

సాగర్ జిల్లా షాపూర్‌లో భారీ వర్షాల కారణంగా శిథిలావస్థకు చేరిన ఇంటి గోడ కూలి 9 మంది అమాయక చిన్నారులు మృతి చెందారనే వార్త వినడం బాధాకరమని, గాయపడిన పిల్లలకు సరైన చికిత్స జిల్లా అధికార యంత్రాంగాన్ని ఆదేశిస్తూ సీఎం యాదవ్‌ ఎక్స్‌లో పోస్ట్‌లో పేర్కొన్నారు.

ఈ ఘటనలో గాయపడిన మిగతా చిన్నారులు త్వరగా కోలుకోవాలని ప్రార్థించారు. మృతుల కుటుంబాలకు ప్రభుత్వం తరపున రూ.4 లక్షల చొప్పున ఆర్థిక సాయం అందజేస్తామని సీఎం ప్రకటించారు.