Mizoram: కూలిన రైలు వంతెన.. 17 మంది మృతి, పలువురు గల్లంతు

మిజోరంలోని సాయిరాంగ్ ప్రాంతానికి సమీపంలో నిర్మాణంలో ఉన్న రైల్వే వంతెన కూలిపోవడంతో బుధవారం 17 మంది కార్మికులు మరణించారని పోలీసులు తెలిపారు. ఘటనా స్థలంలో మరికొందరు చిక్కుకున్నట్లు భావిస్తున్నారు. ఐజ్వాల్‌కు 21 కిమీ దూరంలో ఉదయం 10 గంటలకు ఈ సంఘటన జరిగినప్పుడు 35-40 మంది కార్మికులు ఉన్నారు. "శిథిలాల నుండి ఇప్పటివరకు పదిహేడు మృతదేహాలను స్వాధీనం చేసుకున్నారు. ఇంకా చాలా మంది తప్పిపోయారు" అని ఒక పోలీసు అధికారి తెలిపారు. యంగ్ మిజో అసోసియేషన్ యొక్క సాయిరాంగ్ శాఖ ప్రస్తుతం రెస్క్యూ కార్యకలాపాలను నిర్వహిస్తోంది.

''కుప్పకూలిన వంతెన ఈశాన్య ప్రాంతంలోని అన్ని రాష్ట్ర రాజధానులను కలిపే భారతీయ రైల్వే ప్రాజెక్ట్‌లో భాగం. కొన్నేళ్లుగా ఇది నిర్మాణంలో ఉంది. ఈ సంఘటన ఉదయం 11 గంటల ప్రాంతంలో జరిగింది. ప్రమాదానికి గల కారణాన్ని మేము ఇంకా నిర్ధారించలేదు. ప్రమాదం సంభవించినప్పుడు ఎంత మంది వ్యక్తులు అందులో ఉన్నారని తెలియరాలేదు ”అని ఈశాన్య ఫ్రాంటియర్ రైల్వే చీఫ్ పబ్లిక్ రిలేషన్స్ ఆఫీసర్ సబ్యసాచి డి చెప్పారు. మిజోరాం ముఖ్యమంత్రి జోరమ్‌తంగా సోషల్ మీడియా ప్లాట్‌ఫామ్ ట్విటర్‌లో ఈ సంఘటనపై విచారం వ్యక్తం చేశారు.

ఈ ఘటన తర్వాత ప్రధాని నరేంద్ర మోదీ మృతుల బంధువులకు రూ.2 లక్షల చొప్పున ఎక్స్‌గ్రేషియా ప్రకటించారు. మిజోరంలో జరిగిన బ్రిడ్జి ప్రమాదం విని చాలా బాధపడ్డానని ప్రధాని మోదీ ట్వీట్‌ చేశారు. తమ ఆత్మీయులను కోల్పోయిన వారికి సంతాపం తెలిపారు. క్షతగాత్రులు త్వరగా కోలుకోవాలని ఆకాంక్షించారు. సహాయక చర్యలు కొనసాగుతున్నాయి. బాధితులకు అన్ని విధాలా సహాయాన్ని అందజేస్తామని ప్రధాని మోదీ అన్నారు.