ఛత్తీస్‌గఢ్‌లో ఎన్‌కౌంటర్‌.. 14 మంది మావోయిస్టులు మృతి.. భారీగా ఆయుధాలు స్వాధీనం

ఛత్తీస్‌గఢ్‌లోని సుక్మా, బీజాపూర్ జిల్లాల్లో భద్రతా దళాలతో జరిగిన రెండు వేర్వేరు ఎన్‌కౌంటర్లలో 14 మంది నక్సలైట్లు మృతి చెందినట్లు అధికారులు తెలిపారు. సుక్మా జిల్లాలో భద్రతా దళాలతో జరిగిన ఎన్‌కౌంటర్‌లో 12 మంది నక్సలైట్లు హతమయ్యారు. కిష్టారామ్ పోలీస్ స్టేషన్ పరిధిలోని పలోడి, పోటక్‌పల్లి ప్రాంతాల నుండి జిల్లా రిజర్వ్ గార్డ్ (DRG) సుక్మా శుక్రవారం సాయంత్రం ఈ ఆపరేషన్‌ను ప్రారంభించింది. సుక్మాలోని కిష్టారామ్ ప్రాంతంలోని పామ్లూర్ గ్రామ సమీపంలో ఈ ఎన్‌కౌంటర్ జరిగింది.

ఈ కాల్పుల్లో భద్రతా దళాలు 12 మంది నక్సల్ కేడర్లను మట్టుబెట్టాయి. మరణించిన వారిలో కొంటా ఏరియా కమిటీ కార్యదర్శి మంగ్డు కూడా ఉన్నారు. మరణించిన మిగిలిన నక్సలైట్ల గుర్తింపు ఇంకా నిర్ధారించబడలేదు. ఎన్‌కౌంటర్ స్థలం నుండి AK-47 మరియు INSAS రైఫిల్స్‌తో సహా ఆటోమేటిక్ ఆయుధాలు స్వాధీనం చేసుకున్నాయి. ఈ ఆపరేషన్‌ను సుక్మా సూపరింటెండెంట్ ఆఫ్ పోలీస్ కిరణ్ చవాన్ నిరంతరం పర్యవేక్షిస్తున్నారని అధికారులు తెలిపారు. మరిన్ని వివరాలు తెలియాల్సి ఉంది.

ఈ రోజు తెల్లవారుజామున బీజాపూర్ జిల్లాలో భద్రతా సిబ్బందితో జరిగిన ప్రత్యేక ఎన్‌కౌంటర్‌లో ఇద్దరు నక్సలైట్లు మృతి చెందినట్లు పోలీసులు తెలిపారు. మావోయిస్టు కేడర్ల ఉనికి గురించి సమాచారం ఆధారంగా జిల్లా దక్షిణ భాగంలోని అటవీ ప్రాంతంలో ఉదయం 5 గంటల ప్రాంతంలో కాల్పులు జరిగాయి. ఛత్తీస్‌గఢ్ పోలీసుల విభాగం అయిన డిస్ట్రిక్ట్ రిజర్వ్ గార్డ్ బృందం నక్సలైట్ల వ్యతిరేక ఆపరేషన్‌ను ప్రారంభించింది. భద్రతా దళాలు సంఘటనా స్థలం నుండి ఇద్దరు నక్సలైట్ల మృతదేహాలను స్వాధీనం చేసుకున్నాయి. అడపాదడపా కాల్పులు ఇంకా కొనసాగుతున్నాయని, మరిన్ని వివరాలు తెలియాల్సి ఉందని అధికారులు తెలిపారు.

గత ఏడాది ఛత్తీస్‌గఢ్‌లో భద్రతా దళాలతో జరిగిన వేర్వేరు ఎన్‌కౌంటర్లలో 285 మంది నక్సలైట్లు హతమయ్యారు. వీరిలో 257 మంది బీజాపూర్‌తో సహా ఏడు జిల్లాలను కలిగి ఉన్న బస్తర్ డివిజన్‌లో, 27 మంది రాయ్‌పూర్ డివిజన్‌లోని గరియాబంద్ జిల్లాలో హతమయ్యారు.