గ్రామీణ బ్యాంకుల్లో 13,217 పోస్టులు.. వెంటనే దరఖాస్తు చేసుకోండి

భారతదేశంలో గ్రామీణ ఆర్థికాభివృద్ధి కోసం స్థాపించబడిన ప్రాంతీయ గ్రామీణ బ్యాంకులు (RRBs), సాధారణ ప్రజలకు సులభంగా బ్యాంకింగ్‌ సేవలను అందించడంలో కీలక పాత్ర పోషిస్తున్నాయి. ప్రతి సంవత్సరం ఈ బ్యాంకుల్లో సిబ్బంది నియామకాన్ని ఐబీపీఎస్‌ నిర్వహిస్తుంది. ఈ సారి CRP RRBs XIV నోటిఫికేషన్‌ ద్వారా 13,217 ఆఫీసర్స్‌ పోస్టుల భర్తీకి దరఖాస్తులను ఆహ్వానించింది. ఆన్‌లైన్‌ పరీక్షలు, ఇంటర్వ్యూలు, ప్రొవిజనల్‌ అలాట్‌మెంట్‌ ద్వారా ఈ నియామకం జరుగుతుంది. ఆఫీసర్స్‌ స్కేల్‌ -1, ఆఫీస్‌ అసిస్టెంట్స్‌ పోస్టులకు రెండు దశల్లో పరీక్షలు (ప్రిలిమినరీ, మెయిన్స్‌) నిర్వహించబడతాయి.

ఆఫీసర్స్‌ స్కేల్‌-2, స్కేల్‌-3 పోస్టులకు మాత్రం ఒకే దశలో ఆన్‌లైన్‌ పరీక్ష జరుగుతుంది. ఆఫీసర్స్‌ స్కేల్‌ 1, 2, 3 అభ్యర్థులకు ప్రధాన పరీక్షలో ఉత్తీర్ణత సాధించిన తర్వాత ఇంటర్వ్యూ ఉంటుంది. ఏదైనా డిగ్రీ (కొన్ని పోస్టులకు స్పెషలైజ్డ్‌ డిగ్రీ అవసరం) ఉత్తీర్ణులైన అభ్యర్థులు దరఖాస్తు చేసుకోవచ్చు. అభ్యర్థుల వయోపరిమితి సెప్టెంబర్‌ 1 నాటికి ఆఫీస్‌ అసిస్టెంట్‌కు 18 నుంచి 28 ఏళ్ల మధ్య, ఆఫీసర్‌ స్కేల్‌ -1 పోస్టులకు 18 నుంచి 30 ఏళ్ల మధ్య, ఆఫీసర్‌ స్కేల్‌ 2 పోస్టులకు 21 ఏళ్ల నుంచి 40 ఏళ్ల మధ్య ఉండాలి. రిజర్వేషన్‌ గల అభ్యర్థులకు వయోపరిమితిలో సడలింపు కలదు.

ఆన్‌లైన్‌ దరఖాస్తు ప్రక్రియ సెప్టెంబర్‌ 1వ తేదీన మొదలైంది. సెప్టెంబర్‌ 21 వరకు దరఖాస్తు చేసుకోవచ్చు. ప్రాథమిక పరీక్షలు నవంబర్‌ - డిసెంబర్‌ 2025లో, ప్రధాన పరీక్షలు డిసెంబర్‌ 2025 నుండి ఫిబ్రవరి 2026లో నిర్వహించబడతాయి. ఆఫీసర్స్‌ పోస్టుల ఇంటర్వ్యూ జనవరి - ఫిబ్రవరి 2026లో జరుగుతాయి. తుది ఫలితాలు, ప్రొవిజనల్‌ అలాట్‌మెంట్‌ ఫిబ్రవరి - మార్చి 2026లోప్రకటించబడతాయి. దరఖాస్తు ఫీజు ఎస్సీ, ఎస్టీ, పీడబ్ల్యూబీడీ వారికి రూ.175, ఇతరులకు రూ.850. WWW.ibps.in లో దరఖాస్తు చేసుకోవాల్సి ఉంటుంది.