Bangladesh : ఆరేళ్ల తర్వాత జైలు నుంచి బ‌య‌ట‌కు వ‌చ్చిన ఆమె ఎవరు.? ప్రధాని అవుతారా.?
బంగ్లాదేశ్‌లో తిరుగుబాటు జరిగిన కొద్ది గంటలకే అధ్యక్షుడు ముహమ్మద్ షహబుద్దీన్ కీలక నిర్ణయం తీసుకున్నారు.
By Medi Samrat Published on 6 Aug 2024 9:57 AM GMT
బంగ్లాదేశ్‌లో తిరుగుబాటు జరిగిన కొద్ది గంటలకే అధ్యక్షుడు ముహమ్మద్ షహబుద్దీన్ కీలక నిర్ణయం తీసుకున్నారు. జైలు శిక్ష అనుభవిస్తున్న ప్రతిపక్ష నేత, మాజీ ప్రధాని ఖలీదా జియాను విడుదల చేయాలని రాష్ట్రపతి ఆదేశించారు. బంగ్లాదేశ్ నేషనలిస్ట్ పార్టీ (బిఎన్‌పి) చైర్‌పర్సన్ బేగం ఖలీదా జియా విడుదలైన వార్తల నేప‌థ్యంలో.. ఆమె దేశ తదుపరి ప్రధానమంత్రి అవుతార‌నే ఊహాగానాలు వచ్చాయి. అయితే ఈ విషయాన్ని ఇంకా అధికారికంగా ప్రకటించలేదు.
షేక్ హాసిన్‌కు గట్టి ప్రత్యర్థిగా భావించే 78 ఏళ్ల ఖలీదా జియా ప్రధాన ప్రతిపక్ష పార్టీ బంగ్లాదేశ్ నేషనలిస్ట్ పార్టీ అధ్యక్షురాలు. ఆమె భర్త 1977 నుండి 1981 వరకు బంగ్లాదేశ్ అధ్యక్షుడిగా ఉన్నారు. 1978లో బంగ్లాదేశ్ నేషనలిస్ట్ పార్టీని స్థాపించారు.
ఖలీదా జియా రాజకీయ జీవితం ఆమె భర్త జియావుర్ రెహ్మాన్ హత్యకు గురైన తర్వాత ప్రారంభమైంది. 1981 మే 30న అప్పటి అధ్యక్షుడు జియావుర్ రెహమాన్ హత్యకు గురయ్యారు. ఆయ‌న మరణం తర్వాత.. ఖలీదా జియా 2 జనవరి 1982న బంగ్లాదేశ్ నేషనలిస్ట్ పార్టీ (BNP)లో చేరారు.
ఖలీదా జియా 1996లో బంగ్లాదేశ్‌కు తొలి మహిళా ప్రధానమంత్రి అయ్యారు. అయితే ఈ ప్రభుత్వం కేవలం 12 రోజులు మాత్రమే కొనసాగుతుంది. అవామీ లీగ్‌తో సహా ప్రధాన ప్రతిపక్ష పార్టీలు ఎన్నికలను అన్యాయంగా అభివర్ణించాయి. దీని తరువాత ఆపద్ధర్మ ప్రభుత్వం ఏర్ప‌డింది. తరువాత సాధారణ ఎన్నికలు జరిగాయి. మళ్లీ ఎన్నికల్లో అవామీ లీగ్ విజయం సాధించి షేక్ హసీనా తొలిసారి ప్రధాని అయ్యారు.
2001లో జరిగిన సార్వత్రిక ఎన్నికల్లో ఖలీదా జియా పార్టీ నాలుగు పార్టీలతో కలిసి ఎన్నికల్లో పోటీ చేసి విజయం సాధించి రెండోసారి ప్రధాని అయ్యారు. 2006లో ఖలీదా తన పదవికి రాజీనామా చేసింది. రాజీనామా చేసిన ఏడాది తర్వాత అవినీతి కేసులో జైలుకు వెళ్లింది. తనపై నమోదైన కేసులన్నీ రాజకీయ ప్రేరేపిత కేసులని ఆమె పేర్కొన్నారు. గత కొన్ని దశాబ్దాలుగా ప్రధానమంత్రి పదవి కోసం ఖలీదా జియా, షేక్ హసీనాల మధ్య పోరు నడుస్తోంది. అందుకే ఇద్దరు నేతల మధ్య జరిగిన పోరును బంగ్లాదేశ్ ప్రజలు 'బేగంల యుద్ధం' అంటారు.
2018లో అవినీతి కేసులో బంగ్లాదేశ్ నేషనలిస్ట్ పార్టీ అధ్యక్షురాలు ఖలీదా జియాకు 17 ఏళ్ల జైలు శిక్ష పడింది. 2018 నుంచి ఆమె జైలులో శిక్ష అనుభవిస్తోంది. అనేక అనారోగ్య సమస్యలను ఎదుర్కొంటున్న ఖలీదా జియా తన చికిత్స కోసం తరచూ విదేశాలకు వెళ్లాల్సి వస్తుంది. ప్రస్తుతం ఆమె ఆసుపత్రిలో చేరారు.
ప్రధానమంత్రిగా ఖలీదా జియా అధికారిక పర్యటన నిమిత్తం రెండుసార్లు మాత్రమే ఆమె భారతదేశాన్ని సందర్శించారు. ఆమె మొదటిసారిగా 1992 మే 26 నుండి 28 వరకు భారతదేశానికి వ‌చ్చారు. ఆ తరువాత ఆమె 20 నుండి 22 మార్చి 2006లో భారతదేశాన్ని సందర్శించారు. తన రెండు పదవీకాలాలలో ఆమె నాలుగు సార్లు పాకిస్తాన్, రెండుసార్లు చైనాను సందర్శించింది. ఇది ఖలీదాకు చైనా, పాకిస్తాన్‌ల పట్ల ఉన్న ప్రేమను స్పష్టంగా ప్రతిబింబిస్తుంది.
