Video : వాణిజ్య భవనం పైకప్పును ఢీకొట్టిన విమానం.. ఇద్దరు దుర్మ‌ర‌ణం

దక్షిణ కాలిఫోర్నియాలోని ఓ వాణిజ్య భవనం పైకప్పును విమానం ఢీకొట్టింది. ఈ ప్రమాదంలో ఇద్దరు మృతి చెందగా, 18 మంది గాయపడ్డారు. ఈ ఘటనపై పోలీసులు సమాచారం అందించారు. ఆరెంజ్ కౌంటీలోని ఫుల్లెర్టన్ నగరంలో గురువారం మధ్యాహ్నం 2.09 గంటలకు విమానం కూలినట్లు పోలీసులకు సమాచారం అందిందని ఫుల్లెర్టన్ పోలీస్ ప్రతినిధి క్రిస్టీ వెల్స్ తెలిపారు.

అగ్నిమాపక సిబ్బంది, పోలీసులు వెంటనే ఘటనా స్థలానికి చేరుకుని మంటలను అదుపులోకి తెచ్చి సమీపంలోని వ్యాపారులను ఖాళీ చేయించారు. అగ్నిప్రమాదంలో కుట్టు మిషన్లు, టెక్స్‌టైల్ స్టాక్‌లు ఉన్న గోదాము దెబ్బతిన్నది. ఇది ఏ రకమైన విమానం, గాయపడిన వారు విమానంలో ఉన్నారా లేదా భూమిపై ఉన్నారా అనేది ఇంకా తెలియరాలేదని వెల్స్ చెప్పారు.

ఫుల్లెర్టన్.. లాస్ ఏంజిల్స్‌కు ఆగ్నేయంగా 40 కిలోమీటర్ల దూరంలో దాదాపు 1,40,000 మంది జనాభా ఉన్న నగరం. ABC న్యూస్ ప్రకారం.. ఈ ప్ర‌మాదంలో గాయ‌ప‌డిన తొమ్మిది మంది వ్యక్తులు ఆసుపత్రి పాలయ్యారు. మిగిలిన బాధితులు చికిత్స పొంది విడుదలయ్యారు. కాలిఫోర్నియాలోని ఫుల్లెర్టన్‌లోని రేమర్ అవెన్యూలోని 2300 బ్లాక్‌లో ఈ ప్రమాదం జరిగింది. స్థానిక టెలివిజన్ ఛాన‌ల్‌ ఫుటేజ్, ఛాయాచిత్రాలు భవనం నుండి పొగలు కమ్ముకున్నట్లు చూపించాయి.

ఫెడరల్ ఏవియేషన్ అడ్మినిస్ట్రేషన్ ఈ విమానాన్ని సింగిల్ ఇంజిన్ వ్యాన్స్ RV-10గా గుర్తించింది. ఆరెంజ్ కౌంటీలోని భాగాలకు ప్రాతినిధ్యం వహిస్తున్న యుఎస్ ప్రతినిధి లౌ కొరియా.. విమానం ఫర్నిచర్ తయారీ భవనంపై కూలిపోయిందని ట్విట్టర్ లో పంచుకున్నారు.

డిస్నీల్యాండ్ నుండి 6 మైళ్ల దూరంలో ఉన్న ఫుల్లెర్టన్ మున్సిపల్ ఎయిర్‌పోర్ట్ సమీపంలో ఈ ప్రమాదం జరిగింది. సాధారణ విమానయాన సేవలను అందించే ఈ విమానాశ్రయంలో ఒకే రన్‌వే, హెలిపోర్ట్ ఉన్నాయి. దీని చుట్టూ నివాస పరిసరాలు, వాణిజ్య గిడ్డంగులు, సమీపంలోని మెట్రోలింక్ రైలు మార్గం ఉన్నాయి.ఫ్లైట్-ట్రాకింగ్ వెబ్‌సైట్ FlightAware నాలుగు-సీట్లు, ఒకే ఇంజిన్ కలిగిన విమానం టేకాఫ్ అయిన ఒక నిమిషం తర్వాత క్రాష్ అయినట్లు సూచించింది.