ఆకాశంలో మెరుస్తున్న వస్తువులు.. ఆందోళనలో ప్రజలు
అమెరికాలోని ఆకాశంలో మెరుస్తున వస్తువులు కలకలం సృష్టిస్తున్నాయి.
By Kalasani Durgapraveen
అమెరికాలోని ఆకాశంలో మెరుస్తున వస్తువులు కలకలం సృష్టిస్తున్నాయి. న్యూజెర్సీలోని పలు ప్రాంతాల్లో రాత్రి వేళ ఆకాశంలో అనుమానాస్పదంగా కనిపించాయి. ప్రజలు ఆందోళనకు గురవుతున్నారు. అవి యూఎఫ్వో (UFO) తరహా డ్రోన్లుగా అనుమానాలు వ్యక్తం అవుతున్నాయి. ఈ మేరకు మీడియా కథనాలు ప్రచురించాయి.
ఇటీవల న్యూజెర్సీలో ప్రకాశవంతమైన డ్రోన్లు ఎగిరాయి. తమ భవనాల మీదుగా ఇవి ఎగరడంతో ప్రజలు ఆందోళన వ్యక్తం చేస్తున్నారు. వీటికి సంబంధించిన దృశ్యాలు నెట్టింట వైరల్గా మారాయి. దీంతో అవి హెలికాఫ్టర్లు అని కొందరు చెబుతుండగా.. యూఎఫ్వో తరహా డ్రోన్లుగా మరికొందరు అనుమానిస్తున్నారు. అయితే.. గత నెలలో న్యూజెర్సీలోని పలు ప్రాంతాల్లో ఇలాంటి ఘటనలే చోటు చేసుకున్నాయి.
దాదాపు పది ప్రాంతాల్లో డ్రోన్లు ఎగరడాన్ని స్థానికులు గుర్తించారు. అదే సమయంలో అమెరికా అధ్యక్ష ఎన్నికల్లో భారీ విజయం సాధించిన డొనాల్డ్ ట్రంప్కు సంబంధించిన భవనాల సమీపంలోనూ ఇలాంటి డ్రోన్లు కనిపించడంతో ఫెడరల్ ఏవియేషన్ అడ్మినిస్ట్రేషన్ స్పందించింది. ఈ ప్రాంతంలో డ్రోన్ కార్యకలాపాలపై నిషేధం విధించింది. న్యూజెర్సీలో తాజా ఘటనపై స్పందించిన గవర్నర్ ఫిల్ మర్ఫీ దీనిపై అధికారులు విచారణ చేపడుతున్నారని, ప్రజలకు ఎలాంటి ముప్పు లేదని పేర్కొన్నారు.