దక్షిణాఫ్రికా అధ్యక్షుడు రామఫోసాకు కరోనా పాజిటివ్‌.. కొత్త వేరియంటేనా.?

దక్షిణాఫ్రికా దేశ అధ్యక్షుడు సిరిల్‌ రామఫోసాకు కరోనా మహమ్మారి సోకింది. ఆదివారం నాడు రామఫోసాకు కరోనా పాజిటివ్‌గా నిర్దారణ అయ్యింది. ప్రస్తుతం తేలికపాటి లక్షణాలతో ఆయన చికిత్స పొందుతున్నారని ప్రెసిడెన్సీ ఒక ప్రకటనలో తెలిపింది. ఇప్పటికే రామఫోసా కరోనా రెండు డోసుల వ్యాక్సిన్‌ తీసుకున్నారు. కేప్‌ టౌన్‌లో మాజీ ప్రెసిడెంట్‌ ఎఫ్‌డబ్ల్యూ డి క్లెర్క్‌ కోసం రాష్ట్ర స్మారక సేవ నుండి బయల్దేరిని తర్వాత రామఫోసా అనారోగ్యానికి గురయ్యాడు. వెంటనే అతడికి పరీక్షలు నిర్వహించగా పాజిటివ్‌ తేలిందని అధికారులు వెల్లడించారు. అత్యంత పరివర్తన చెందిన ఓమిక్రాన్ వేరియంట్ గత నెలలో దక్షిణాఫ్రికాలో మొదటిసారిగా వెలుగు చూసింది. ఇది ఇతర వేరియంట్‌ల కంటే ఎక్కువ అంటువ్యాధి అనే భయంతో ప్రపంచ భయాందోళనలను రేకెత్తిస్తోంది.

రామఫోసా ప్రస్తుతానికి కేప్ టౌన్‌లో ఐసోలేషన్‌లో ఉన్నారు. డిప్యూటీ ప్రెసిడెంట్ డేవిడ్ మబుజాకు అన్ని బాధ్యతలను అప్పగించారు. అధ్యక్షుడు రామపోసో ఇటీవలే నైజీరియా వెళ్లివచ్చారు. డిసెంబర్‌ 8న సెనెగల్‌ నుంచి వచ్చిన తర్వాత పరీక్షలు చేయగా ఆయనకు నెగెటివ్‌ వచ్చిందని తెలిపారు. అయితే తాజాగా చేసిన కరోనా పరీక్షల్లో అతడికి పాజిటివ్‌గా నిర్దారణ అయ్యిందని అధికారులు తెలిపారు. ప్రెసిడెంట్‌తో పరిచయం ఉన్న వ్యక్తులు కరోనా పరీక్షలు చేయించుకోవాలని అధికారులు సూచించారు.

"నా సోదరుడు సిరిల్ రామఫోసా, మీకు కోవిడ్-19కి పాజిటివ్ నిర్దారణ అయ్యిందని నేను చాలా చింతిస్తున్నాను. మీరు త్వరగా కోలుకోవాలని కోరుకుంటున్నాను. దృఢంగా ఉండండి! కలిసి ఉండండి!" అని ప్రపంచ ఆరోగ్య సంస్థ చీఫ్ టెడ్రోస్ అధనామ్ ఘెబ్రేయేసస్ ట్వీట్ చేశారు. ప్రపంచవ్యాప్తంగా ఉన్న దేశాలలో ఓమిక్రాన్‌ కేసులు నమోదు అవుతున్నాయి. ఇది మరింత తీవ్రమైన అనారోగ్యానికి కారణమవుతుందా లేదా అది ఎంత మేరకు వ్యాక్సిన్‌ల నుండి తప్పించుకోగలదో ఇంకా పూర్తిగా స్పష్టంగా తెలియలేదు. దక్షిణాఫ్రికాలో నిన్న ఒక్కరోజే 17,154 కరోనా కేసులు నమోదయ్యాయి.