అమెరికాలో 165 ఏళ్ల సంప్రదాయానికి స్వస్తి..కరెన్సీపై ఇక డొనాల్డ్ ట్రంప్ సంతకం

అమెరికా చరిత్రలో ఎన్నడూ లేని విధంగా ఒక చారిత్రాత్మక మార్పు చోటుచేసుకోబోతోంది. అమెరికా స్వాతంత్ర్య దినోత్సవ 250వ వార్షికోత్సవాన్ని పురస్కరించుకుని, దేశంలోని కొత్త కరెన్సీ నోట్లన్నింటిపై అధ్యక్షుడు డొనాల్డ్ ట్రంప్ సంతకం ఉండబోతోందని ట్రెజరీ శాఖ గురువారం ప్రకటించింది.

అమెరికా చరిత్రలో ఒక దేశాధ్యక్షుడి సంతకం కరెన్సీ నోట్లపై రావడం ఇదే తొలిసారి. ఈ నిర్ణయం ద్వారా 1861 నుండి అంటే దాదాపు 165 ఏళ్లుగా కొనసాగుతున్న సంప్రదాయానికి తెరపడనుంది. సాధారణంగా కరెన్సీ నోట్లపై ఉండే 'ట్రెజరర్ ఆఫ్ ది యునైటెడ్ స్టేట్స్' సంతకాన్ని ఇకపై తొలగించనున్నారు. ట్రెజరీ సెక్రటరీ స్కాట్ బెస్సెంట్ సంతకంతో పాటు ట్రంప్ సంతకం ఉన్న మొదటి 100 డాలర్ల నోట్లు జూన్ మాసంలో ముద్రించబడతాయని, ఆ తర్వాత మిగిలిన నోట్లు కూడా చలామణిలోకి వస్తాయని అధికారులు తెలిపారు.

దేశ ఆర్థిక పురోగతిని, చారిత్రాత్మక విజయాలను గుర్తించడానికి డాలర్ బిల్లులపై ట్రంప్ పేరు ఉండటం సరైన గౌరవమని ట్రెజరీ సెక్రటరీ బెస్సెంట్ పేర్కొన్నారు. ప్రస్తుతం చలామణిలో ఉన్న నోట్లపై మాజీ ట్రెజరీ సెక్రటరీ జానెట్ యెలెన్, ట్రెజరర్ లిన్ మలెర్బా సంతకాలు ఉన్నాయి. లిన్ మలెర్బా సంతకంతో 1861 నుండి వస్తున్న సుదీర్ఘ సంప్రదాయం ముగియనుంది. కేవలం కరెన్సీ మాత్రమే కాకుండా, జూలై 4న జరిగే వేడుకల్లో భాగంగా ట్రంప్ చిత్రం ఉన్న 24 క్యారెట్ల బంగారు నాణేన్ని కూడా విడుదల చేసేందుకు ఫెడరల్ ఆర్ట్స్ కమిషన్ ఇప్పటికే ఆమోదం తెలిపింది.