ఘోర ప్రమాదం, లోయలోకి దూసుకెళ్లిన బస్సు..17 మంది మృతి

నేపాల్‌లోని పృథ్వీ హైవేపై సోమవారం తెల్లవారుజామున జరిగిన ఘోర బస్సు ప్రమాదంలో 17 మంది మరణించగా, మరో 24 మంది గాయపడ్డారు. పర్యాటక నగరం పోఖారా నుండి రాజధాని ఖాట్మండుకు వెళ్తున్న ఈ బస్సు, అర్ధరాత్రి దాటిన తర్వాత నియంత్రణ కోల్పోయి కొండపై నుండి త్రిశూలి నది ఒడ్డున పడిపోయింది. ప్రమాదం జరిగిన వెంటనే చేరుకున్న సహాయక బృందాలు క్షతగాత్రులను వెలికితీసి ఆసుపత్రులకు తరలించాయి.

పర్వత ప్రాంతాల్లోని ఇరుకైన రహదారులు, వాహనాల నిర్వహణ సరిగ్గా లేకపోవడం వల్ల నేపాల్‌లో ఇలాంటి ప్రమాదాలు తరచుగా జరుగుతుంటాయి. గతంలో 2024లో కూడా ఇదే నదిలో రెండు బస్సులు పడిపోయి 65 మంది ప్రాణాలు కోల్పోగా, అందులో ఒక బస్సు శిథిలాలు ఈ ఏడాదిలోనే ఇసుకలో కూరుకుపోయి లభ్యమయ్యాయి. తాజా ప్రమాదానికి గల కారణాలపై పోలీసులు దర్యాప్తు జరుపుతున్నారు.