ఇరాన్ 'హార్ముజ్ జలసంధి'ని మూసివేస్తే.. భార‌త్‌లో చమురు ధరలపై తీవ్ర ప్ర‌భావం..!

పశ్చిమాసియాలో పెరుగుతున్న ఉద్రిక్తతల నేప‌థ్యంలో చమురు, గ్యాస్ సరఫరా, ధరలపై భారత ప్రభుత్వం నిశితంగా గమనిస్తోంది. నివేదికల ప్రకారం.. మూడు ఇరాన్ అణు కేంద్రాలపై US దాడి తర్వాత ఇరాన్ ప్ర‌భుత్వం హార్ముజ్ జలసంధిని మూసివేయాలని యోచిస్తోంది. ప్రపంచంలోని చమురు, గ్యాస్‌లో ఐదవ వంతు సరఫరాకు ఈ జలసంధి ఒక ముఖ్యమైన మార్గం.

భార‌త్‌ తన చమురు అవసరాలలో ఎక్కువ భాగాన్ని ఈ మార్గం ద్వారా దిగుమతి చేసుకుంటుంది. ఈ మార్గం ఆగిపోతే దాని ప్రభావం భార‌త్‌పై పడే అవకాశం ఉంది. అయితే ప్రజలకు ఇంధనం అందుతుందని, సరఫరాలో ఎలాంటి కొరత ఉండదని ప్రభుత్వం హామీ ఇచ్చింది.

గత రెండు వారాలుగా మధ్యప్రాచ్యంలో పరిస్థితిని భారత్ పర్యవేక్షిస్తోందని పెట్రోలియం, సహజవాయువు శాఖ మంత్రి హర్దీప్ సింగ్ పూరి తెలిపారు. ప్రధాని నరేంద్ర మోదీ నేతృత్వంలో చమురు సరఫరా వనరులను వైవిధ్యపరచడం గురించి ఆయన మాట్లాడారు.

మేము కొన్ని సంవత్సరాలుగా మా సరఫరా మార్గాలను మార్చుకున్నాము. మా చమురు సరఫరాలో ఎక్కువ భాగం హోర్ముజ్ జలసంధి ద్వారా రాదు. మా చమురు మార్కెటింగ్ కంపెనీల వద్ద చాలా వారాలకు స‌రిప‌డ‌ స్టాక్‌లు ఉన్నాయి. మేము అనేక మార్గాల నుండి ఇంధన సరఫరాలను పొందుతున్నాము. మా పౌరులకు స్థిరమైన ఇంధన సరఫరాను నిర్ధారించడానికి మేము అవసరమైన ప్రతి చర్యను తీసుకుంటామని పేర్కొన్నారు.

హర్దీప్ సింగ్ పూరి ANIతో మాట్లాడుతూ.. "ధరల గురించి ఊహించడం చాలా కష్టం. చాలా కాలం వరకు, చమురు ధర $ 65 నుండి $ 70 మధ్య ఉంది.. అత‌కుముందు ధ‌ర‌లు $ 70 నుండి $ 75 మధ్య ఉన్నాయి. హార్ముజ్ జలసంధి మూసివేత ప్రభావం ధరలలో కనిపిస్తుంది. కానీ నేను చాలా కాలంగా చెబుతున్నట్లుగా.. ప్రపంచ మార్కెట్లలో తగినంత చమురు అందుబాటులో ఉంది. "ముఖ్యంగా పశ్చిమ అర్ధగోళం నుండి చమురు సరఫరాలు పెరుగుతున్నాయి. "సాంప్రదాయ సరఫరాదారులు కూడా సరఫరా చేయ‌డానికి ఆసక్తి చూపుతారు.. ఎందుకంటే వారికి కూడా ఆదాయం అవసరం. మార్కెట్ దానిని పరిగణనలోకి తీసుకుంటుందని ఆశిస్తున్నాము" అని ఆయన చెప్పారు. మోదీ ప్రభుత్వం గత కొన్నేళ్లుగా సరఫరా స్థిరత్వాన్ని నిర్ధారించడమే కాకుండా ధరలను అందుబాటులో ఉంచింది. మేము అవసరమైన అన్ని చర్యలు తీసుకుంటామని పేర్కొన్నారు.

చమురు, గ్యాస్ "అత్యంత సున్నితమైన" రంగం అని నిపుణులు విశ్వసిస్తున్నారు. చిన్న అంతరాయాలు కూడా గ్లోబల్ క్రూడ్ ఆయిల్ ధరలలో భారీ పెరుగుదలకు దారితీస్తాయి. హార్ముజ్ జలసంధి మూసివేత "వారానికి పైగా" కొనసాగితే.. అది ప్రపంచ ఆర్థిక వ్యవస్థను షాక్‌కు గురి చేస్తుంది.

భారతదేశం రష్యా నుండి ముడి చమురును దిగుమతి చేసుకుంటోంది.. అయితే దాని లాభదాయకత తగ్గింపులు, ధరల ధోరణులపై ఆధారపడి ఉంటుంది. ముడి చమురు ధర బ్యారెల్‌కు 105 డాలర్ల కంటే ఎక్కువగా ఉంటే, ఇంధనంపై ఎక్సైజ్ సుంకాన్ని తగ్గించడాన్ని ప్రభుత్వం సమీక్షించవచ్చని ఎన్‌డిటివి ఒక మూలాన్ని ఉటంకిస్తూ పేర్కొంది.