సైనైడ్ ఇచ్చి 14 మందిని చంపింది.. అత్యంత ప్రమాదకరమైన సీరియల్ కిల్లర్‌కు మరణశిక్ష
థాయ్ కోర్టు 36 ఏళ్ల మహిళకు మరణశిక్ష విధించింది. ఆ మ‌హిళ‌ను దేశ చరిత్రలోనే అత్యంత ప్రమాదకరమైన సీరియల్ కిల్లర్‌గా అభివర్ణించారు.
By Medi Samrat Published on 21 Nov 2024 11:08 AM GMT
థాయ్ కోర్టు 36 ఏళ్ల మహిళకు మరణశిక్ష విధించింది. ఆ మ‌హిళ‌ను దేశ చరిత్రలోనే అత్యంత ప్రమాదకరమైన సీరియల్ కిల్లర్‌గా అభివర్ణించారు. 14 మంది స్నేహితులకు సైనైడ్ ఇచ్చి హత్య చేసిన కేసులో స‌ర‌ర‌త్‌ రంగశివుతాపోర్న్‌కు కోర్టు మరణశిక్ష విధించింది. 2015 నుంచి ఇప్పటి వరకు 14 మందిని ఆ మహిళ హత్య చేసింది. తన స్నేహితుడి హత్య కేసులో ఆమెకు శిక్ష పడింది. మరోవైపు స‌ర‌ర‌త్‌ రంగశివుతాపోర్న్‌పై మరో 13 కేసులు కోర్టులో పెండింగ్‌లో ఉన్నాయి.
2023లో స‌ర‌ర‌త్‌ రంగశివుతాపోర్న్ తన స్నేహితురాలు సిరిపోర్న్‌తో కలిసి ఖంగావ్‌ని సందర్శించడానికి వెళ్లింది. ఇద్దరూ ఘాట్‌పై ఉన్న చేపలకు ప‌దార్ధాల‌ను తినిపించారు, తరువాత ఇద్దరూ రాత్రి భోజనం చేశారు. తిన్న కొద్దిసేపటికే సిరిపోర్న్ ఆరోగ్యం క్షీణించి నది ఒడ్డున పడిపోయింది. స‌ర‌ర‌త్‌ తన స్నేహితురాలు తన కళ్ల ముందు బాధ పడుతుండడం చూస్తూ ఉండిపోయింది.
సిరిపోర్న్‌కు పోస్టుమార్టం నిర్వహించగా.. ఆహారంలో సైనైడ్ కలిపినట్లు తేలింది. స‌ర‌ర‌త్‌ పై సిరిపోర్న్ కుటుంబం పోలీసులకు ఫిర్యాదు చేసింది. పోలీసులు ఆధారాలు సేకరించి మే 2023లో శరత్‌ను అరెస్టు చేశారు.
దీని తర్వాత స‌ర‌ర‌త్‌ భయంకరమైన రహస్యాన్ని బయటపెట్టింది. 2015 నుంచి ఇప్పటి వరకు సైనైడ్ ఇచ్చి 14 మందిని హత్య చేసినట్లు పోలీసుల విచార‌ణ‌లో తేలింది. మృతుల్లో స‌ర‌ర‌త్‌ మాజీ ప్రేమికుడు, స్నేహితులు, ఓ పోలీసు అధికారి ఉన్నారని పోలీసులు తెలిపారు. వీరిలో 12 మంది మహిళలు, ఇద్ద‌రు పురుషులు ఉన్నారు.
స‌ర‌ర‌త్‌ ఇలా ఎందుకు చేసింది అనేది ప్రశ్న. ఈ హత్యలన్నీ డబ్బు కోసమే చేసినట్లు పోలీసులు తెలిపారు. స‌ర‌ర‌త్‌ జూదానికి బానిస అయ్యింది. ఆమె అప్పుల ఊబిలో కూరుకుపోయింది. ఆమెకు క్రెడిట్ కార్డ్ అప్పు ఉంది. ఆమె తన స్నేహితులు, సన్నిహితుల దగ్గర డబ్బులు అడిగేది. ఆమెను డబ్బు తిరిగి అడిగితే.. వారిని చంపేసేది. తాగునీరు, ఆహారం, మందుల్లో సైనైడ్ కలిపి ఈ నేరానికి పాల్పడింది. 15 మందికి విషపూరిత మూలికలతో కూడిన క్యాప్సూల్స్‌ను స‌ర‌ర‌త్‌ తినిపించినట్లు థాయ్‌లాండ్ పోలీసులు తెలిపారు. అయితే వీరిలో ఒకరు ప్రాణాలతో బయటపడ్డారు. స‌ర‌ర‌త్‌ ప్రస్తుతం 13 వేర్వేరు హత్య కేసులను ఎదుర్కొంటోంది. ఆమెపై మొత్తం 80 కేసులు నమోదయ్యాయి.
