వాలెంటైన్స్ డే : ప్రభుత్వం సంచ‌ల‌న నిర్ణయం.. ఉచితంగా 9 కోట్ల కండోమ్స్ పంపిణీ
Ahead of Valentine's Day Thailand to distribute 95 million free condoms.వాలెంటైన్స్ డే సంద‌ర్భంగా థాయిలాండ్ ప్రభుత్వం
By తోట వంశీ కుమార్‌ Published on 3 Feb 2023 6:20 AM GMT
వాలెంటైన్స్ డే(ప్రేమికుల దినోత్స‌వం) సంద‌ర్భంగా థాయిలాండ్ ప్రభుత్వం సంచ‌ల‌న నిర్ణయం తీసుకుంది. ఫిబ్రవరి 14 నాటికి దేశ వ్యాప్తంగా 95 మిలియ‌న్ల ఉచిత కండోమ్లను పంపిణీ చేయ‌నుంది. ఈ కార్య‌క్ర‌మం బుధవారం (1 ఫిబ్రవరి 2023) నుంచి ప్రారంభ‌మైంది. లైంగికంగా సంక్రమించే వ్యాధులను అరికట్టేందుకు, యువతులు గర్భం దాల్చకుండా ఉండేందుకు ఈ నిర్ణయం తీసుకున్నారు. ఈ కండోమ్లను ఏదైనా ఫార్మసీ లేదా ప్రాథమిక ఆరోగ్య కేంద్రం నుండి ఉచితంగా తీసుకోవచ్చని థాయ్‌లాండ్ ప్రభుత్వ ప్రతినిధి రచాడ ధనాదిరెక్ తెలిపారు. థాయ్‌లాండ్‌లో యూనివర్సల్ హెల్త్‌కేర్ కార్డ్ ఉన్న వ్యక్తులు సంవత్సరానికి ప్రతి వారం 10 కండోమ్లను ఉచితంగా తీసుకోవ‌చ్చు.
అవాంఛిత గర్భాలను నివారించడానికి, లైంగికంగా సంక్రమించే వ్యాధుల వ్యాప్తిని నిరోధించడానికి, క్యాన్సర్, హెచ్‌ఐవి, సిఫిలిస్ మరియు ఇతర తీవ్రమైన వ్యాధుల సంక్రమణను నివారించడానికి ప్రభుత్వం ఈ నిర్ణయం తీసుకుందని థాయ్‌లాండ్ జాతీయ ఆరోగ్య భద్రతా కార్యాలయం (NHSO) పేర్కొంది. కండోమ్‌లు నాలుగు సైజుల్లో లభిస్తాయని, లూబ్రికేటింగ్ జెల్ కూడా ఉచితంగా ఇవ్వబడుతుందని తెలిపింది.
ఉచిత కండోమ్‌లు పొందడానికి పావోటాంగ్ అనే అప్లికేషన్ ద్వారా రిజిస్ట్రేషన్ చేసుకోవాలి. స్మార్ట్‌ఫోన్ లేని వారు నేరుగా దుకాణానికి వెళ్లి ఐడీ కార్డు చూపించి డబ్బులు చెల్లించకుండా కండోమ్‌లు కొనుగోలు చేయవచ్చు. యూనివర్సల్ హెల్త్‌కేర్ కార్డులు ఉన్న వారికి ఏడాది పొడవునా ప్రతి వారం ఉచిత కండోమ్‌లు ఇవ్వబడతాయి. గత కొన్ని సంవత్సరాలుగా థాయిలాండ్‌లో STDలు మరియు సిఫిలిస్ వంటి సమస్యలు వేగంగా పెరిగాయి. అందుకే థాయ్‌లాండ్ ప్రభుత్వం ఇలాంటి చర్యలు తీసుకుంటోంది.
