పాకిస్తాన్‌కు గ‌ట్టి షాక్ ఇవ్వ‌నున్న భార‌త్‌..!

పహల్గామ్ ఉగ్రవాద దాడి తర్వాత భారత్‌ మొదట పాకిస్తాన్‌తో సింధు జల ఒప్పందాన్ని రద్దు చేసుకుంది. తరువాత ఆపరేషన్ సింధూర్ ద్వారా పాక్‌ను దెబ్బ కొట్టింది. తాజాగా మరొక పెద్ద అడుగు వేయడానికి సన్నాహాలు జరుగుతున్నాయి. వేసవి రాబోతోంది. పాకిస్తాన్ నీటి సమస్యలు మరింత పెరిగే అవకాశం ఉన్న నేప‌థ్యంలో రావి న‌ది నుండి పాకిస్తాన్‌కు మిగులు జలాల ప్రవాహాన్ని ఆపాలని భారత్‌ యోచిస్తోంది.

జమ్మూ కాశ్మీర్ మంత్రి జావేద్ అహ్మద్ రాణా ప్రకారం.. సింధు జల ఒప్పందం నిలిపివేయడం వల్ల పంజాబ్-జమ్మూ కాశ్మీర్ సరిహద్దులోని షాపూర్ కండి ఆనకట్ట పనులు వేగవంతం అయ్యాయి. ఈ ప్రాజెక్ట్ ముగింపు దశకు చేరుకుంది.

ఆనకట్ట అందుబాటులోకి వస్తే, పాకిస్తాన్‌లోకి ప్రవహించే రావి నది నుండి ఎక్కువ మొత్తంలో నీటిని భారత్‌ ఆపగలదని మంత్రి అన్నారు. షాపూర్ కండి ఆనకట్ట పనులు మార్చి 31 నాటికి పూర్తవుతాయని, దాని నీటిని కరువు పీడిత కథువా, సాంబా జిల్లాలకు మళ్లిస్తామని రాణా అన్నారు.

"పాకిస్తాన్‌కు వెళ్లే అదనపు నీటిని ఆపుతాము. దానిని ఆపాలి. కథువా, సాంబా జిల్లాలు కరువు ప్రభావిత ప్రాంతాలు, మా ప్రాధాన్యత కలిగిన ఈ ప్రాజెక్టును కండి ప్రాంతం కోసం నిర్మిస్తున్నారు" అని ఆయన అన్నారు.

ప్రస్తుతం రావి నది నీటిలో ఎక్కువ భాగం మాధోపూర్ ద్వారా పాకిస్తాన్‌లోకి ప్రవహిస్తుంది. ఈ ఆనకట్ట ఈ నీటిని పంజాబ్, జమ్మూ కాశ్మీర్‌కు మళ్లిస్తుంది. షాపూర్ కండి ఆనకట్ట ప్రాజెక్టు దాదాపు ఐదు దశాబ్దాల క్రితం 1979లో రూపొందించబడింది. రావి నది నీరు పాకిస్తాన్‌లోకి ప్రవహించకుండా నిరోధించడానికి ఇది ప్రణాళిక చేయబడింది.

ఈ ప్రాజెక్టుకు 1982లో మాజీ ప్రధానమంత్రి ఇందిరా గాంధీ పునాది రాయి వేశారు. అయితే.. పంజాబ్, జమ్మూ కాశ్మీర్ ప్రభుత్వాల మధ్య అంతర్గత విభేదాలు నిర్మాణాన్ని నిలిపివేసాయి. 2008లో ఈ ప్రాజెక్టును జాతీయ ప్రాజెక్టుగా ప్రకటించారు.

దీనిని ₹3,394.49 కోట్లు (సుమారు 80 శాతం) ఖర్చుతో నిర్మిస్తున్నారు, దీనిలో పంజాబ్ ₹2,694.02 కోట్లు (సుమారు 80 శాతం) సమకూరుస్తోంది, మిగిలిన ₹700.45 కోట్లు (20 శాతం) భారత ప్రభుత్వం సమకూరుస్తోంది. ఈ ఆనకట్ట 55.5 మీటర్ల ఎత్తు, 7.7 కి.మీ పొడవైన హైడల్ ఛానల్‌ను కలిగి ఉంది.

అధికారుల ప్రకారం, ఈ ప్రాజెక్టు పంజాబ్‌లో దాదాపు 5,000 హెక్టార్ల భూమికి, జమ్మూ కాశ్మీర్‌లోని కథువా మరియు సాంబాలో 32,173 హెక్టార్లకు పైగా భూమికి సాగునీరు అందించడానికి సహాయపడుతుంది.