మొరాకోలో భారీ భూకంపం.. చాలా సేపు దద్దరిల్లిన భూమి.. 632 మంది మృతి

సెంట్రల్ మొరాకోలో భారీ భూకంపం సంభవించింది. రిక్టర్ స్కేలుపై భూకంప తీవ్రత 6.8గా నమోదైంది. ఈ సంభవించిన శక్తివంతమైన భూకంపం కారణంగా కనీసం 632 మంది మరణించినట్లు అంతర్గత మంత్రిత్వ శాఖ శనివారం ధృవీకరించింది. భారీ సంఖ్యలో ప్రజలు గాయపడ్డారు.

యుఎస్ జియోలాజికల్ సర్వే ప్రకారం.. భూకంప కేంద్రం మర్రకేష్‌కు నైరుతి దిశలో 71 కి.మీ దూరంలో ఉన్న హై అట్లాస్ పర్వతాలలో 18.5 కి.మీ లోతులో ఉన్నట్లు బీబీసీ రిపోర్ట్‌ చేసింది. చాలా సెకన్ల పాటు భూమి కంపించింది. రాత్రి 11.11 గంటలకు భూకంపం సంభవించింది. మొరాకో నేషనల్ సీస్మిక్ మానిటరింగ్ అండ్ అలర్ట్ నెట్‌వర్క్ రిక్టర్ స్కేల్‌పై 7గా నమోదైంది. 19 నిమిషాల తర్వాత 4.9 తీవ్రతతో భూకంపం సంభవించినట్లు యూఎస్‌ ఏజెన్సీ నివేదించింది.

సోషల్ మీడియాలో వీడియోలు రోడ్లపై, దెబ్బతిన్న భవనాలు, శిథిలాలతో నిండిన వీధుల్లోకి ప్రజలు పారిపోతున్నట్లు చూపించాయి. భూకంప కేంద్రానికి దాదాపు 350 కిలోమీటర్ల దూరంలో ఉన్న రాజధాని రబాత్‌తో పాటు కాసాబ్లాంకా, ఎస్సౌయిరా నగరాల్లో కూడా ప్రకంపనలు సంభవించినట్లు సమాచారం. గాయపడిన 300 మందిని చికిత్స కోసం ఆసుపత్రులకు తరలించారు. నగరాలు, పట్టణాల వెలుపల ఎక్కువ నష్టం సంభవించిందని మంత్రిత్వ శాఖ రాసింది.

అయితే, నష్టం ఏ స్థాయిలో ఉందో అధికారులు ఇంకా తేల్చలేదు. భూకంపం కారణంగా మృతులకు ప్రధాని నరేంద్ర మోదీ సంతాపం తెలిపారు. మొరాకోలో భూకంపం కారణంగా ప్రాణాలు కోల్పోయినందుకు చాలా బాధపడ్డానని ఎక్స్‌లో పేర్కొన్నారు. గాయపడిన వారు త్వరగా కోలుకోవాలి. ఈ కష్ట సమయంలో మొరాకోకు అన్ని విధాలా సహాయాన్ని అందించడానికి భారతదేశం సిద్ధంగా ఉందని అన్నారు.