Hyderabad: విద్యార్థినులను అనుచితంగా తాకిన ప్రిన్సిపాల్‌.. కేసు నమోదు

హైదరాబాద్ నగరంలో మరో కీచక ఘటన వెలుగు చూసింది. ఓ ప్రైవేట్ స్కూల్ ప్రిన్సిపాల్ విద్యార్థినులను అనుచితంగా తాకాడు. కుషాయిగూడ పోలీసు పరిధిలోని ఏఎస్ రావు నగర్‌లోని పాఠశాలలో ఈ ఘటన చోటుచేసుకుంది. పాఠశాలలో అదనపు తరగతుల సమయంలో బాలికలు ఈ కష్టాలను ఎదుర్కొన్నారు. విద్యార్థినిలను అనుచితంగా తాకుతూ ప్రిన్సిపాల్‌ లైంగిక వేధింపులకు పాల్పడ్డాడు. సాధారణ పాఠశాల సమయం ముగిసిన తర్వాత అదనపు తరగతులు నిర్వహిస్తున్న సమయంలో ఈ ఘటన చోటుచేసుకుందని ఆరోపించారు. ఈ ఘటనపై 10వ తరగతి చదువుతున్న నలుగురు విద్యార్థినిలు ప్రైవేట్ స్కూల్ ప్రిన్సిపాల్‌పై కేసు పెట్టారు. ఫిర్యాదు ఆధారంగా పోలీసులు కేసు నమోదు చేశారు. నిందితుడిపై BNS చట్టంలోని సెక్షన్ 74 కింద కేసు నమోదు చేయబడింది.

స్కూల్ ప్రిన్సిపాల్ బాలికలను అనుచితంగా తాకాడన్న ఆరోపణలపై పోలీసులు దర్యాప్తు చేస్తున్నారు. ఈ ఘటనపై తల్లిదండ్రులు, విద్యార్థి సంఘాల సభ్యులు ఆగ్రహం వ్యక్తం చేశారు. పాఠశాల ఆవరణలో విద్యార్థినిల తల్లిదండ్రులు నిరసన వ్యక్తం చేశారు. సాయంత్రం అదనపు తరగతుల సమయంలో అనుచితంగా ప్రవర్తించారని ఆరోపించారు. తల్లిదండ్రుల గుంపు పాఠశాల ఆస్తులను ధ్వంసం చేయడంతో పాటు ప్రిన్సిపాల్‌పై భౌతికంగా దాడి చేయడంతో పరిస్థితి తీవ్రమైంది. స్థానికుల ఆందోళనతో పోలీసులు అప్రమత్తమయ్యారు. ఘటనాస్థలికి చేరుకుని పరిస్థితిని అదుపులోకి తెచ్చారు. దాడి సమయంలో గాయపడిన నిందితుడు ప్రిన్సిపాల్‌ను వైద్య చికిత్స కోసం సమీపంలోని ఆసుపత్రికి తరలించారు.