బాచుపల్లి ఎమ్మార్వో ఇచ్చిన నోటీసులతో హైడ్రాకు సంబంధం లేదు: ఏవీ రంగనాథ్
బాచుపల్లి ఎమ్మార్వో ఇటీవల అందించిన నోటీసులు హైడ్రా విభాగానికి పూర్తిగా సంబంధం లేదని హైడ్రా కమిషనర్ ఏవీ రంగనాథ్ స్పష్టం చేశారు.
By అంజి
బాచుపల్లి ఎమ్మార్వో ఇచ్చిన నోటీసులతో హైడ్రాకు సంబంధం లేదు: ఏవీ రంగనాథ్
హైదరాబాద్: బాచుపల్లి ఎమ్మార్వో ఇటీవల అందించిన నోటీసులు హైడ్రా విభాగానికి పూర్తిగా సంబంధం లేదని హైడ్రా కమిషనర్ ఏవీ రంగనాథ్ స్పష్టం చేశారు. మాదాపూర్‌లోని మేడికుంట సరస్సు సమీపంలో ఉన్న రెండు అపార్ట్‌మెంట్లకు ఎమ్మార్వో నోటీసులు జారీ చేసినట్లు సమాచారం. హైడ్రా విడుదల చేసిన ఒక ప్రకటనలో, రంగనాథ్ తనకు లేదా హైడ్రా అధికారికి నోటీసుల గురించి ముందస్తుగా తెలియదని, ఈ విషయంపై తాను ఇప్పటికే మేడ్చల్-మల్కాజ్‌గిరి జిల్లా కలెక్టర్‌తో మాట్లాడానని పేర్కొన్నారు.
బాచుపల్లి ఎమ్వార్వో ఇచ్చిన నోటీసులతో హైడ్రాకు సంబంధం లేదు అని హైడ్రా కమిషనర్ ఏవీ రంగనాథ్ ఆదివారం ఒక ప్రకటనలో పేర్కొన్నారు. అలాంటి నోటీసులు జారీ చేయడానికి గల కారణాలపై ఎమ్మార్వో నుండి వివరణ తీసుకోవాలని కలెక్టర్‌ను కోరినట్లు హైడ్రా కమిషనర్ తెలిపారు. హైడ్రాను నోటీసులతో అనుసంధానిస్తూ ఎంపీ ఈటెల రాజేందర్ చేసిన వ్యాఖ్యలను ఖండిస్తూ, అవి తప్పుదారి పట్టించేవి, విచారకరం అని ఆయన అభివర్ణించారు.
"ప్రతి నోటీసును, కూల్చివేతను హైడ్రాకు ఆపాదించడం వల్ల ప్రజలలో అనవసరమైన భయం, గందరగోళం ఏర్పడుతుంది" అని రంగనాథ్ అన్నారు. పెద్ద ఎత్తున భూ ఆక్రమణలకు వ్యతిరేకంగా హైడ్రా దృఢమైన వైఖరిని ఆయన పునరుద్ఘాటించారు. సాధారణ పౌరుల హక్కులను పరిరక్షించడంలో దాని నిబద్ధతను కూడా హైలైట్ చేశారు.
హైడ్రా కమిషనర్.. ఎంపీ ఈటల హైడ్రాను తప్పుడుగా ఇరికించడానికి చేసిన ప్రయత్నాలను విమర్శించారు, గతంలో సచివాలయంలో జరిగిన చర్చలో స్పష్టంగా వివరించినట్లుగా, ఆ శాఖ బాధ్యతల గురించి ఎంపీకి ఇప్పటికే బాగా తెలుసునని పేర్కొన్నారు.
జూలై 2024 కి ముందు నిర్మించిన నివాస ఆస్తులపై హైడ్రా చర్య తీసుకోదని, అవసరమైన అనుమతులు పొందిన వాణిజ్య నిర్మాణాలను తొలగించదని రంగనాథ్ స్పష్టం చేశారు. “హైడ్రా పేదలను లేదా సామాన్యులను వేధించదు” అని ఆయన పునరుద్ఘాటించారు.
ముఖ్యంగా హైడ్రా యొక్క పారదర్శకత, ప్రజానుకూల పనితీరు గురించి ప్రజలకు స్పష్టమైన అవగాహన ఉన్న సమయంలో, పౌరులను తప్పుదారి పట్టించే నిరాధారమైన ఆరోపణలు చేయకుండా ఉండాలని రంగనాథ్ ప్రజా ప్రతినిధులకు విజ్ఞప్తి చేశారు.
