'రొమ్ము క్యాన్సర్‌ కేసుల్లో.. అగ్రస్థానంలో హైదరాబాద్‌'.. కలవరపెడుతున్న నివేదిక

నేషనల్ క్యాన్సర్ రిజిస్ట్రీ ప్రోగ్రామ్ (NCRP) కింద నిజాం ఇన్స్టిట్యూట్ ఆఫ్ మెడికల్ సైన్సెస్ (NIMS) విడుదల చేసిన జనాభా ఆధారిత క్యాన్సర్ రిజిస్ట్రీ (PBCR) నివేదిక (2014–2016).. హైదరాబాద్‌లో ఆందోళనకరమైన క్యాన్సర్ ధోరణులను వెల్లడించింది. భారతదేశంలో అత్యధిక రొమ్ము క్యాన్సర్ సంభవం రేటును హైదరాబాద్‌ నగరం నమోదు చేసింది. వయస్సు-సర్దుబాటు రేటు (AAR) లక్ష మంది మహిళల్లో 48 మంది క్యాన్సర్‌ బారిన పడుతున్నారు.

వయస్సు-సర్దుబాటు రేటు పరంగా హైదరాబాద్ ఇతర ప్రధాన మెట్రోపాలిటన్ నగరాలను అధిగమించింది. వాటిలో చెన్నై (42.2), బెంగళూరు (40.5), ఢిల్లీ (38.6), ముంబై (34.4), పూణే (30) ఉన్నాయి. దీనికి విరుద్ధంగా, మేఘాలయ లక్ష మంది మహిళలకు 7 చొప్పున అత్యల్ప వయస్సు-సర్దుబాటు రేటుని నివేదించింది. నేషనల్ క్యాన్సర్ రిజిస్ట్రీ ప్రోగ్రామ్ కింద 28 జనాభా-ఆధారిత క్యాన్సర్ రిజిస్ట్రీల (PBCRs) నుండి వచ్చిన డేటా ఆధారంగా ఈ నివేదిక రూపొందించబడింది.

నివేదిక ప్రకారం, మహిళల్లో రొమ్ము క్యాన్సర్ అత్యంత ప్రబలంగా కనిపించగా, పురుషులలో నోటి క్యాన్సర్ సర్వసాధారణంగా మారింది. 2014 - 2016 మధ్య, హైదరాబాద్‌లో 11,596 కొత్త క్యాన్సర్ కేసులు నమోదయ్యాయి. వాటిలో 5,143 పురుషులు, 6,453 మహిళలు ఉన్నారు. క్రూడ్ ఇన్సిడెన్స్ రేటు (CIR) పురుషులకు లక్ష జనాభాకు సంవత్సరానికి 84.2, మహిళలకు 109.8. పురుషులకు వయస్సు-సర్దుబాటు రేట్లు (AAR) 101.6 , మహిళలకు 136గా ఉంది.

నేషనల్ సెంటర్ ఫర్ డిసీజ్ ఇన్ఫర్మేటిక్స్ అండ్ రీసెర్చ్ (NCDIR), ఇండియన్ కౌన్సిల్ ఆఫ్ మెడికల్ రీసెర్చ్ (ICMR) భాగస్వామ్యంతో NIMS లోని మెడికల్ ఆంకాలజీ విభాగం రూపొందించిన ఈ నివేదిక హైదరాబాద్‌లో క్యాన్సర్ కేసుల ఆందోళనకరమైన పెరుగుదలను వెలుగులోకి తెచ్చింది.