హెచ్‌సీఏ మాజీ అధ్యక్షుడు జగన్ మోహన్ రావుకు బెయిల్

హైదరాబాద్ క్రికెట్ అసోసియేషన్ అధ్యక్షుడు జగన్ మోహన్ రావుకు హైకోర్టులో భారీ ఊరట దక్కింది. ఆయనకు హైకోర్టు గురువారం షరతులతో కూడిన బెయిల్ మంజూరు చేసింది. ఒక లక్ష రూపాయల రెండు షూరిటీలు సమర్పించాలని హైకోర్టు ఆదేశించింది. సీఐడీ జూలై 9న నకిలీ డాక్యుమెంట్లు సృష్టించడం, నిధుల దుర్వినియోగం, నేరపూరిత విశ్వాస ఉల్లంఘన ఆరోపణలపై అరెస్టు చేసింది. కోశాధికారి సి శ్రీనివాస్‌రావు, చీఫ్‌ ఎగ్జిక్యూటివ్‌ ఆఫీసర్‌ సునీల్‌ కాంతే, శ్రీ చక్ర క్రికెట్‌ క్లబ్‌ అధికారులు రాజేందర్‌ యాదవ్‌, ఆయన భార్య జి కవిత సహా మరో నలుగురు అధికారులను ఇదే ఆరోపణల కింద అరెస్టు చేశారు.

ఈ సంవత్సరం ప్రారంభంలో సన్‌రైజర్స్ హైదరాబాద్ (SRH) ఫ్రాంచైజీ IPL మ్యాచ్‌ల కాంప్లిమెంటరీ టిక్కెట్ల విషయంలో వేధింపులకు గురిచేస్తోందని ఆరోపించడంతో HCA వివాదంలో చిక్కుకుంది. SRH యాజమాన్యం ప్రత్యామ్నాయ స్టేడియానికి వెళ్తామ‌ని బెదిరించే స్థాయికి ఈ వివాదం పెరిగింది. దీంతో తెలంగాణ ప్రభుత్వం విచారణ ప్రారంభించింది.

అధికారిక ఒప్పందం ప్రకారం.. SRH HCAకి 10 శాతం (3,900) కాంప్లిమెంటరీ టిక్కెట్‌లను కేటాయిస్తుంది.. ఇందులో 50 సీట్ల సామర్థ్యం కలిగిన కార్పొరేట్ బాక్స్‌కు యాక్సెస్ ఉంటుంది. అయితే, ఈ బాక్స్‌లో కేవలం 30 మంది మాత్రమే కూర్చుంటారని క్రికెట్ సంఘం పేర్కొంది. మరో బాక్స్‌ నుండి అదనంగా 20 టిక్కెట్లను డిమాండ్ చేసింది. ఇది అసమంజసంగా ఉందని SRH గుర్తించింది.