'హిమాయత్ సాగర్ ఎకో పార్క్‌ను పూర్తి చేయండి'.. సీఎంని కోరిన కేటీఆర్‌

హైదరాబాద్ సమీపంలోని కొత్వాల్‌గూడ వద్ద హిమాయత్ సాగర్ లేక్ ఫ్రంట్‌పై ఎకో పార్క్ ప్రాజెక్టును పూర్తి చేయాలని మున్సిపల్ అడ్మినిస్ట్రేషన్ అండ్‌ అర్బన్ డెవలప్‌మెంట్ మాజీ మంత్రి కెటి రామారావు (కేటీతఆర్) తెలంగాణ ముఖ్యమంత్రి ఎ రేవంత్ రెడ్డిని కోరారు. గత ఏడాది భారత రాష్ట్ర సమితి (బీఆర్‌ఎస్) హయాంలో ప్రారంభమైన ఈ ప్రాజెక్టు గత ఏడాది గులాబీ పార్టీ అధికారం నుంచి తప్పుకున్న తర్వాత నిలిచిపోయిందని ఆయన వ్యాఖ్యానించారు.

''హైదరాబాద్ సమీపంలోని కొత్వాల్‌గూడ వద్ద హిమాయత్ సాగర్ లేక్ ఫ్రంట్‌లో దాదాపు 125 ఎకరాల్లో భారతదేశంలోనే అతిపెద్ద ఏవియరీ, అక్వేరియం, బోర్డ్‌వాక్స్, ల్యాండ్‌స్కేప్డ్ పార్కులు, వారాంతపు క్యాంపింగ్ వంటి ఆకర్షణలతో మేము 'ఎకో పార్క్' అనే ప్రతిష్టాత్మక ప్రాజెక్ట్‌ను ప్రారంభించాము. ప్రాజెక్ట్ అక్టోబర్ 2022లో ప్రారంభించబడింది. మేము ప్రభుత్వంలో ఉన్నప్పుడు పనులు జరిగాయి. కానీ ఇప్పుడు అక్కడ పనులు జరగడం లేదు. గత కొన్ని నెలలుగా ప్రభుత్వం నుండి మద్దతు లేకపోవడంతో ప్రాజెక్ట్ నిలిచిపోయిందని నేను తెలుసుకున్నాను'' అని కేటీఆర్‌ పేర్కొన్నారు.

''ఈ ప్రాజెక్ట్‌ను ముందుకు తీసుకెళ్లాలని, హైదరాబాదీలు మేము భావించిన విధంగా గొప్ప కుటుంబ విహారయాత్రను కలిగి ఉండేలా చూడాలని నేను తెలంగాణ సీఎంని అభ్యర్థిస్తున్నాను'' అని కేటీఆర్‌ ఎక్స్‌ పోస్ట్‌లో అన్నారు.

హిమాయత్ సాగర్ ఎకో పార్క్ ప్రాజెక్టు అభివృద్ధికి హెచ్‌ఎండీఏ రూ.75 కోట్ల బడ్జెట్‌ను కేటాయించగా, ఇప్పటివరకు ప్రాజెక్టుకు రూ.35.6 కోట్లు ఖర్చు చేశారు. ఎకో-పార్కు మొదటి దశను 2023లో అప్పటి ఎంఏ అండ్ యూడీ మంత్రి కేటీఆర్ ప్రారంభించారు, మిగిలిన దశల పనులు ఇంకా పూర్తి కాలేదు.