బాచుపల్లి ప్రమాద ఘటనలో GHMC, BRSపై కేసు నమోదు చేయాలి: కాంగ్రెస్

బాచుపల్లి ఏరియాలో 8 ఏళ్ల బాలిక రోడ్డు ప్రమాదంలో మరణించడానికి గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసి), భారత రాష్ట్ర సమితి (బీఆర్‌ఎస్) ప్రభుత్వ నిర్లక్ష్యమే కారణమని కాంగ్రెస్ ఆరోపించింది. ఇటీవల కురిసిన వర్షాలకు బీఆర్‌ఎస్ ప్రభుత్వం ఎటువంటి చర్యలు తీసుకోకపోవడంతో హైదరాబాద్‌లోని రోడ్లు ప్రజలకు ప్రాణ సంకటంగా మారాయని పలువురు కాంగ్రెస్ నాయకులు ఆరోపించారు. బుధవారం ఓ తండ్రి తన కుమార్తె దీక్షితను ద్విచక్ర వాహనంపై పాఠశాలకు తీసుకెళ్తుండగా ఒక గుంత కారణంగా బైక్ నుండి పడిపోయారు. ఇంతలో వెనుక నుండి వస్తున్న బస్సు అమ్మాయిని ఢీకొట్టింది.

టీపీసీసీ అధికార ప్రతినిధి సయ్యద్ నిజాముద్దీన్ మాట్లాడుతూ జీహెచ్‌ఎంసీ పరిధిలో రోడ్లు అధ్వానంగా ఉండడంతో అనేక ప్రమాదాలు జరుగుతున్నాయని ఆరోపించారు. హైదరాబాద్‌లోని రోడ్లపై 3,500కు పైగా గుంతలు ఉన్నాయని.. వాటిని అధికారులు మూసి వేస్తేనే మరణాలను అరికట్టవచ్చని ఆయన నొక్కి మరీ చెప్పారు. ప్యాచ్‌వర్క్ నిర్వహిస్తున్నట్లు GHMC చెబుతున్నా.. ఎలాంటి చర్యలు తీసుకోకపోవడం దారుణమని అన్నారు.

“BRS పాలనలో ఉన్న రోడ్లు ఎంతో మంది ప్రాణాలు తీసేలా ఉన్నాయి, హైదరాబాద్‌లోనే ప్రతి సంవత్సరం జరిగే 2,500 రోడ్డు ప్రమాదాల్లో 300 మంది మరణిస్తున్నారు. 2,000 మందికి పైగా గాయపడ్డారు. ప్రమాదాల సంఖ్య ప్రకారం టాప్ 10 మిలియన్లకు పైగా ఉన్న నగరాల్లో హైదరాబాద్ ఎనిమిదో స్థానంలో నిలిచింది, ”అని ఆయన అన్నారు. నిర్లక్ష్యానికి కారణమైన దీక్షిత మృతిపై 304ఏ సెక్షన్‌ కింద బస్సు డ్రైవర్‌, జీహెచ్‌ఎంసీ, బీఆర్‌ఎస్‌ ప్రభుత్వంపై కేసు నమోదు చేయాలని కాంగ్రెస్‌ నేత డిమాండ్‌ చేశారు. గుంతలు, రోడ్లు మరమ్మతులు చేయని వాళ్లు బాధ్యత వహించాలని అన్నారు. సాధారణ ప్రజలు రోడ్ యాక్సిడెంట్ అనాలిసిస్ గ్రూప్ లేదా యాక్సిడెంట్ డేటా మేనేజ్‌మెంట్ సిస్టమ్ వంటి ఫ్యాన్సీ నిబంధనలపై ఆసక్తి చూపరని నిజాముద్దీన్ అన్నారు. ప్రజలు కేవలం మంచి రోడ్లు ఉంటే చాలు.. సౌకర్యవంతంగా డ్రైవ్ చేకుంటే చాలని అనుకుంటారని అన్నారు. ప్రభుత్వానికి కూడా జవాబుదారీతనం ఉండాలి.. ప్రమాదానికి ప్రత్యక్షంగా లేదా పరోక్షంగా బాధ్యులైన ఏ అధికారి అయినా శిక్షను ఎదుర్కోవలసి ఉంటుందని అన్నారు.

గుంతలతో కూడిన రోడ్లు.. వార్నింగ్ బోర్డులకు సంబంధించిన సర్వే

ఇటీవల కురిసిన వర్షాలకు గ్రేటర్ హైదరాబాద్ పరిధిలోని అన్ని రహదారుల పరిస్థితిపై వెంటనే సర్వే నిర్వహించాలన్నారు. సురక్షితం కాని రోడ్లు, గుంతలకు సంబంధించిన సమగ్ర జాబితాను పబ్లిక్ డొమైన్‌లో ఉంచాలని అన్నారు. "వెంటనే మరమ్మతులు సాధ్యం కాని పక్షంలో రోడ్లపై 'జాగ్రత్తగా నడపండి, ఈ రహదారి సురక్షితం కాదు' అనే సూచిక బోర్డులను ఏర్పాటు చేయాలని ఆయన కోరారు. అధ్వాన్నమైన రోడ్లను యుద్ధ ప్రాతిపదికన మరమ్మతులు చేయాలి, ”అని సయ్యద్ అన్నారు. అధ్వాన్నమైన రహదారి పరిస్థితుల వల్ల మరణాలకు కారణమైన అధికారులను శిక్షించడంతో పాటు రాష్ట్ర ప్రభుత్వం జవాబుదారీగా ఉండాలని ఆయన అన్నారు. “దీక్షిత మృతికి మేము ప్రగాఢ సంతాపం తెలియజేస్తున్నాము. ఆమె ప్రాణాలను కాపాడలేకపోయినందుకు చింతిస్తున్నాము. భవిష్యత్ లో దీక్షిత వంటి వాళ్ళను కాపాడుకోవడానికి మనమందరం ప్రయత్నించాలి, ”అని ఆయన అన్నారు.

సమావేశంలో హైదరాబాద్ జిల్లా కమిటీ అధ్యక్షుడు సమీర్ వలీవుల్లా, లింగోజిగూడ డివిజన్ కార్పొరేటర్ దర్పల్లి రాజశేఖర్ రెడ్డి, జీహెచ్‌ఎంసీ మాజీ ఫ్లోర్ లీడర్ వాజిద్ హుస్సేన్, టీపీసీసీ అధికార ప్రతినిధులు మేడిపల్లి రవిచంద్ర, డాక్టర్ లింగం యాదవ్ తదితరులు పాల్గొన్నారు.