హైద‌రాబాద్ లోక్‌స‌భ‌ బీజేపీ అభ్యర్థి మాధవి లతపై కేసు నమోదు

హైదరాబాద్ బీజేపీ అభ్యర్థి మాధవి లతపై కేసు నమోదు అయ్యింది. ఎన్నిక‌ల‌ ప్ర‌చారంలో పాల్గొన్న ఆమె బేగంబజార్ వద్ద ఉన్న మక్కా వైపు గురిపెడుతూ ఉహాజ‌నిత బాణం విడిచిన వ్యవహారంపై ఓ వ్యక్తి ఫిర్యాదు చేయడంతో పోలీసులు కేసు నమోదు చేశారు. దీనికి సంబంధించిన వీడియో కూడా సోషల్ మీడియాలో వైరల్ గా మారింది. శ్రీరామనవమి శోభాయాత్ర సందర్భంగా జ‌రిగిన ఈ వ్యవహారంపై ఇప్పటికే రాజకీయ దుమారం చెలరేగుతుంది. మాధవి లత తీరుపై ఎంఐఎం తీవ్ర అభ్యంతరం వ్యక్తం చేసింది.

వైర‌లైన ఈ వీడియోపై మాధవి లత వివరణ కూడా ఇచ్చారు. కావాలని తనపై తప్పుడు ప్రచారం చేస్తున్నారని పేర్కొన్నారు. శ్రీరామనవమి శోభాయాత్ర రోజు గాలిలో బాణం విసిరిన తనను మాస్క్ పై విసిరినట్లుగా క్రియేట్ చేసి ఆ వీడియోను సోషల్ మీడియాలో కావాలనే పోస్ట్ చేశారని అన్నారు.అయితే ఈ వీడియో ముస్లీంల‌ మనోభావాలను దెబ్బతీసే విధంగా ఉందని.. తీవ్ర అభ్యంతరం వ్యక్తం చేస్తూ షేక్ ఇమ్రాన్ అనే వ్యక్తి మాధవి లత పై బేగంబజార్ పోలీస్ స్టేషన్‌లో ఫిర్యాదు చేశారు. ఈ మేరకు పోలీసులు మాధవి లతపై కేసు నమోదు చేశారు.