బొప్పాయి ఎక్కువగా తింటున్నారా?.. సైడ్ ఎఫెక్ట్స్ తెలుసుకోండి..!

బొప్పాయి ఆరోగ్యానికి వరం. ఆరోగ్యానికి అవసరమైన అన్ని పోషకాలు బొప్పాయిలో పుష్క‌లంగా ఉన్నాయి. బొప్పాయి శరీరాన్ని అనేక వ్యాధుల నుండి రక్షించడంలో సహాయపడుతుంది. బొప్పాయి తినడానికి చాలా రుచిగా ఉంటుంది. విటమిన్-ఎ, విటమిన్-సి, ఫైబర్, ఫోలేట్ వంటి పోష‌కాలు ఇందులో ఉన్నాయి. జీర్ణవ్యవస్థ ఆరోగ్యంగా ఉండాలంటే బొప్పాయిని తినాలని నిపుణులు సూచిస్తున్నారు.

అయితే.. బొప్పాయిని అధికంగా తీసుకోవడం ఆరోగ్యానికి హానికరం. బొప్పాయిని ఎక్కువ‌గా తీసుకుంటే ప్రయోజనంతో పాటు అనేక వ్యాధుల బారిన పడే అవ‌కాశ‌ముంద‌ని హెచ్చ‌రిస్తున్నారు. కాబట్టి బొప్పాయి తినడం వల్ల కలిగే దుష్ప్రభావాలు తెలుసుకుందాం.

ఆరోగ్య నిపుణుల అభిప్రాయం ప్రకారం.. గర్భిణీ స్త్రీలు బొప్పాయికి దూరంగా ఉండాలి. దీన్ని తినడం వల్ల గర్భస్రావం జరుగుతుంది. బొప్పాయిలో ఉండే పాపైన్ శరీరంలోని కొన్ని పొరలను దెబ్బతీస్తుంది. పిండం అభివృద్ధికి దీనిని దూరంగా ఉంచ‌డం చాలా అవసరం.

బొప్పాయిలో పపైన్ అలెర్జీలకు కూడా కారణం కావచ్చు. బొప్పాయిని ఎక్కువగా తీసుకుంటే వాపులు, తల తిరగడం, తలనొప్పి, దద్దుర్లు, దురద వంటి సమస్యలతో ఇబ్బంది పడే అవ‌కాశం ఉంది.

బొప్పాయిలో ఫైబర్ తగినంత పరిమాణంలో ఉంటుంది. ఇది జీర్ణవ్యవస్థను ఆరోగ్యంగా ఉంచడంలో సహాయపడుతుంది. కానీ బొప్పాయిని అధికంగా తీసుకుంటే.. జీర్ణక్రియను ప్రభావితం చేస్తుంది. బొప్పాయి ఎక్కువ‌గా తింటే కడుపుని ఇబ్బంది పెట్టవచ్చు. దీని కారణంగా కడుపులో మంట, నొప్పి సమస్యల‌తో ఇబ్బంది పడే అవ‌కాశం కూడా ఉంది.

బొప్పాయిలో విటమిన్-సి తగినంత పరిమాణంలో లభిస్తుంది. ఇది రక్తంలో క్రియేటినిన్ స్థాయిని నియంత్రించడంలో, కండరాల నొప్పులను తగ్గించడంలో సహాయపడుతుంది. బొప్పాయిని ఎక్కువగా తీసుకోవడం వల్ల కిడ్నీలో రాళ్లు ఏర్పడతాయని కూడా చెబుతున్నారు.

హార్ట్ పేషెంట్స్‌ బొప్పాయిని తీసుకునే ముందు నిపుణుల సలహా తీసుకోవాలి. బొప్పాయి గుండెలో పరిస్థితులను ప్రేరేపిస్తుంది. అందువల్ల గుండె సంబంధిత సమస్యలు ఉంటే.. బొప్పాయిని తినడానికి ముందు వైద్యుడిని అడ‌గాలి.