చలి పెరిగింది.. వృద్ధులు, పిల్లలు అప్రమత్తంగా ఉండాలి: వైద్యులు
Elderly people, children should stay vigilant this winter.. Doctors. హైదరాబాద్: ఈ శీతాకాలంలో చలి వాతావరణం ఎక్కువగా ఉన్నందున తమను తాము రక్షించుకోవడానికి
By అంజి Published on 13 Dec 2022 6:33 AM GMT
హైదరాబాద్: ఈ శీతాకాలంలో చలి వాతావరణం ఎక్కువగా ఉన్నందున తమను తాము రక్షించుకోవడానికి సీనియర్ సిటిజన్లు మార్నింగ్ వాక్‌లకు దూరంగా ఉండాలని, తగిన జాగ్రత్తలు తీసుకోవాలని వైద్యులు సూచిస్తున్నారు. ఫీవర్‌ ఆసుపత్రి సూపరింటెండెంట్‌ డాక్టర్ శంకర్ మాట్లాడుతూ.. ''గత రెండు రోజులుగా వర్షాలు కురుస్తుండటంతో వాతావరణంలో చాలా మార్పులు చోటు చేసుకున్నాయి. ఉష్ణోగ్రత కూడా పడిపోతోంది. ఈ సీజన్‌లో వైరస్ తీవ్రత పెరిగే అవకాశం ఉంది.
ఆస్తమా రోగుల సంఖ్య పెరుగుతోంది. డస్ట్ అలర్జీలు, చర్మ సమస్యలు కూడా పెరుగుతున్నాయి. చిన్నారులు, గర్భిణులు రోగాలబారిన పడుతున్నారు. మార్నింగ్ వాకింగ్‌కు వెళ్లే సమయంలో వృద్ధులకు కొన్ని సమస్యలు ఎదురవుతాయి. కొన్ని మలేరియా, టైఫాయిడ్ కేసులు కూడా గమనించబడుతున్నాయి. ప్రజలు తమ చెవులు, ముక్కులకు రక్షణగా మంకీ క్యాప్‌లు ధరించడం వంటి జాగ్రత్తలు తీసుకోవాలి'' అని అన్నారు.
''ప్రజలు చెవులు, ముక్కులను రక్షించే మంకీ క్యాప్‌లు ధరించడం వంటి జాగ్రత్తలు తీసుకోవాలి. స్వెటర్ల వంటి ఉన్ని బట్టలు వాడాలి. చేతి తొడుగులు కూడా ఉపయోగించవచ్చు. గర్భిణులు, పిల్లలు, వృద్ధులు, హైపర్‌టెన్షన్, డయాబెటిస్, కిడ్నీ, ఆస్తమా ఉన్నవారు ప్రత్యేక జాగ్రత్తలు తీసుకోవాలి'' అని డాక్టర్ శంకర్ తెలిపారు.
మెడిసిన్ ప్రొఫెసర్ డాక్టర్ కొండల్ రెడ్డి మాట్లాడుతూ.. ''డెంగ్యూ జ్వరాలు తగ్గుముఖం పట్టాయన్నారు. మేము శ్వాసకోశ అనారోగ్యం, గొంతు గర గర కావడం, ముక్కు కారడం, తక్కువ-స్థాయి జ్వరం వంటి కేసులను చూస్తున్నాం. చాలా మంది రోగులు ఎటువంటి యాంటీబయాటిక్స్ ఉపయోగించకుండా సాధారణ మందులతో చికిత్స పొందుతున్నారు. చాలా మంది పిల్లలు శ్వాసకోశ వ్యాధుల బారిన పడుతున్నారు. 5 సంవత్సరాల కంటే తక్కువ వయస్సు ఉన్న వారు, వృద్ధులు, యువకులు మరింత జాగ్రత్తగా ఉండాలి. 60 ఏళ్లు పైబడిన వారు ఇంట్లోనే ఉండేందుకు ప్రయత్నించాలి, మార్నింగ్ వాక్‌లకు దూరంగా ఉండాలి.'' అని అన్నారు.
డాక్టర్ కొండల్ రెడ్డి మాట్లాడుతూ.. గుండె జబ్బులు ఉన్న రోగులకు గుండెపోటు వచ్చే అవకాశం ఉందన్నారు. వైరల్ న్యుమోనియా కూడా పెరుగుతుంది. ''చిన్న పిల్లలను ఏదైనా వ్యాధిగ్రస్తుల నుండి దూరంగా ఉంచాలి. వృద్ధులు, పిల్లలకు క్రమం తప్పకుండా టీకాలు వేయాలి. డెంగ్యూ వ్యాధిగ్రస్తుల సంఖ్య తగ్గుముఖం పట్టింది. ప్రభుత్వం కూడా సరిపడా మందులు అందించేందుకు చర్యలు చేపట్టింది. వైద్యశాలలో ప్రజలకు మందులు ఇవ్వడంతో పాటు అవగాహన కల్పిస్తున్నారు'' అని డాక్టర్ కొండల్ రెడ్డి తెలిపారు.
