తరచూ మిస్‌ క్యారేజ్‌ అవుతోందా?

మిస్‌ క్యారేజ్‌ ఎక్కువగా మొదటి 3 నెలల్లో జరగడం సర్వసాధారణం. ఇలా గర్భం కోల్పోవడం శారీరకంగా, మానసికంగా బాధాకరమైన విషయం. కొన్నిసార్లు మిస్‌ క్యారేజ్‌కు ఖచ్చితమైన కారణాన్ని కనుగొనడం కష్టం. కానీ మిస్‌ క్యారేజ్‌ లక్షణాలు కనిపించిన వెంటనే డాక్టర్‌ను సంప్రదించి దీన్ని నివారించడానికి తగిన జాగ్రత్తలు పాటిస్తే మంచిది. మొదటి త్రైమాసికంలో 50 శాతం కంటే ఎక్కువ మిస్‌ క్యారేజ్‌లు క్రోమోజోమ్‌ లేదా జన్యుపరమైన అసాధారణత కారణంగా జరుగుతాయి. ఒక వేళ పిండంలో ఏదైనా జనెటికల్‌ డ్యామేజ్‌ ఉంటే పిండం ఎదగడం కష్టం.

రక్తస్రావం లేదా రక్తం గడ్డకట్టడం అనేది మిస్‌ క్యారేజ్‌కు రెండవ కారణం. సబ్‌ క్రోనిక్‌ రక్త స్రావంతో కూడా గర్భం కోల్పోయే అవకాశాలు ఉన్నాయి. రెండవ త్రైమాసికంలో మిస్‌ క్యారేజ్‌ అయితే గర్భాశయం లేదా సర్విక్స్‌ ఇన్‌ఫెక్షన్‌లకు గురయ్యే అవకాశం ఉంటుంది. మిస్‌ క్యారేజ్‌ నివారించడానికి తీసుకోవాల్సిన మొదటి స్టెఫ్‌ ఫోలిక్‌ యాసిడ్‌ తీసుకోవడం. ఇలా చేస్తే గర్భంలో పుట్టుక వచ్చే లోపాలను తగ్గించే అవకాశం ఉంది. అలాగే మిస్‌ క్యారేజ్‌ రిస్క్‌ను కూడా తగ్గిస్తుంది.

ప్రెగ్నెన్సీని ముందుగానే ప్లాన్‌ చేసుకోవడం చాలా ముఖ్యం. ప్రెగ్నెన్సీ ప్లాన్‌ చేసే 3 నెలల ముందు నుంచి 400 మైక్రోగ్రాముల ఫోలిక్‌ యాసిడ్‌ సప్లిమెంటేషన్‌ తీసుకోవాలి. ప్రెగ్ఎన్సీ సమయంలో కూడా దీన్ని కొనసాగించడం మంచిది. ఆరోగ్యకరమైన జీవనశైలిని అనుసరించడం, మంచి ఆహారం తినడం, హైడ్రేటెడ్‌గా ఉండటం, క్రమం తప్పకుండా వ్యాయామం చేయడం, తగినంత విశ్రాంతి తీసుకోవడం వంటివి చేస్తే చాలా హెల్ప్‌ అవుతుంది. అలాగే స్మోకింగ్‌, ఆల్కహాల్‌ వంటి వాటికి దూరంగా ఉండాలి.