FactCheck : ప్రధాని నరేంద్ర మోదీకి షేక్ హ్యాండ్ ఇవ్వడానికి ఇటలీ ప్రధానమంత్రి సంకోచించారా..?

ప్రధాని నరేంద్ర మోదీ ఇటలీ ప్రధాని జార్జియో మెలోనితో కరచాలనం చేసేందుకు ప్రయత్నిస్తున్న ఫోటో ఒకటి సోషల్ మీడియాలో వైరల్‌గా మారింది

ఆమె ప్రధాని మోదీతో కరచాలనం చేసేందుకు నిరాకరించారని సోషల్ మీడియా వినియోగదారులు ఫోటోను షేర్ చేస్తున్నారు. ఒక ఫేస్‌బుక్ వినియోగదారు ఫోటోను షేర్ చేసి, “ఇటలీ ప్రధాని జార్జియా మెలోని నరేంద్ర మోదీతో కరచాలనం చేయడానికి నిరాకరించారు." అని అన్నారు.

చాలా మంది ట్విట్టర్, ఫేస్‌బుక్ వినియోగదారులు కూడా అదే విషయాన్ని క్లెయిమ్ చేస్తూ ఫోటోను పంచుకున్నారు.

ఇటలీ ప్రధాని జార్జియా మెలోని ఇటీవల భారత పర్యటనకు వచ్చినప్పటి ఫోటో ఇదని వినియోగదారులు చెబుతూ వస్తున్నారు.

నిజ నిర్ధారణ :

ఈ క్లెయిమ్ ప్రజలను తప్పుదోవ పట్టించేదిగా ఉందని న్యూస్‌మీటర్ కనుగొంది.

PMO అధికారిక యూట్యూబ్ ఛానెల్‌లో, రాష్ట్రపతి భవన్‌లో ఇటాలియన్ ప్రధాన మంత్రి మెలోనిని ఆహ్వానిస్తున్న వీడియోను మేము కనుగొన్నాము. ప్రధాన మంత్రి మోదీ ఆమెను కరచాలనంతో స్వాగతించడంతో వీడియో ప్రారంభమవుతుంది.

ఒరిజినల్ వీడియోలో.. దాదాపు 5.21 నిమిషాలకు, ప్రధాని మోదీ అతని క్యాబినెట్ మంత్రులు మళ్లీ పిఎం మెలోనిని కరచాలనంతో స్వాగతిస్తున్నట్లు వీడియో చూపిస్తుంది.

7.58 నిమిషాల మార్క్ వద్ద, మెలోని కారులో బయలుదేరడానికి ముందు, కరచాలనం కోసం పిఎం మోదీ చేయి అందించడం చూడవచ్చు. 7.59 నిమిషాల మార్క్ వద్ద, ఇద్దరూ కరచాలనం చేయడాన్ని మళ్ళీ గమనించవచ్చు.

వీడియోలోని వ్యాఖ్యాత కూడా వారిద్దరూ కలిసినప్పుడు "నమస్తే- కరచాలనం" రెండింటినీ చూస్తున్నామని చెప్పడం వినవచ్చు.

వైరల్ పోస్టుల్లో చెబుతున్నట్లుగా ప్రధాని నరేంద్ర మోదీకి షేక్ హ్యాండ్ ఇవ్వడానికి ఇటలీ ప్రధానమంత్రి సంకోచించారన్నది అబద్దం.