వాల్తేరు వీరయ్య నుండి వచ్చేస్తున్న 'బాస్‌ పార్టీ' సాంగ్‌

మెగాస్టార్‌ చిరంజీవి హీరోగా నటిస్తున్న సినిమా 'వాల్తేరు వీరయ్య'. బాబీ (కేఎస్ ర‌వీంద్ర‌) దర్శకత్వం వహిస్తున్న ఈ సినిమా టైటిల్‌ టీజర్‌ కు ఇప్పటికే మంచి రెస్పాన్స్ వచ్చింది. తాజాగా సినిమా మేకర్స్‌ ఫస్ట్‌ సింగిల్‌ కు సంబంధించిన అప్డేట్ ఇచ్చారు. 'బాస్‌ పార్టీ' అంటూ మొదటి పాట రాబోతోందని అప్‌డేట్ అందించారు. మేకర్స్ నవంబర్ 23న సాయంత్రం 4 గంటలకు బాస్‌ పార్టీ సాంగ్‌ను విడుదల చేయనున్నారు. అందుకు సంబంధించి సాంగ్ పోస్టర్‌ను రిలీజ్ చేశారు.

మ్యూజిక్‌ డైరెక్టర్‌ దేవీ శ్రీ ప్రసాద్‌ మెగా హీరోలకు, ముఖ్యంగా చిరంజీవికి గతంలో అదిరిపోయే సాంగ్స్ ఇచ్చారు. ఇప్పుడు ఈ సినిమా ఆల్బమ్ కూడా అదే స్థాయిలో ఉంటుందని అభిమానులు ఆశిస్తూ ఉన్నారు. బాస్‌ పార్టీ సాంగ్‌లో చిరంజీవి డ్యాన్స్ అదిరిపోనుందని, ఈ విషయాన్ని తెలియజేస్తున్నందుకు చాలా ఎక్జయిట్‌గా ఉందని ఇప్పటికే ట్వీట్ చేశాడు డీఎస్పీ. ఈ చిత్రంలో బాలీవుడ్ భామ ఊర్వశి రౌటేలా స్పెషల్ సాంగ్‌లో మెరువనుంది. ఈ మూవీలో మాస్ మహారాజా ర‌వితేజ కీలక పాత్రలో నటిస్తున్నాడు. మైత్రీ మూవీ మేక‌ర్స్ బ్యాన‌ర్‌పై ప్రతిష్టాత్మకంగా తెర‌కెక్కుతున్న ఈ చిత్రంలో శృతిహాస‌న్ కూడా నటిస్తోంది. వాల్తేరు వీరయ్య 2023 జనవరి 13న థియేటర్లలో విడుదల కాబోతోంది.