తెలంగాణ‌ ప్రభుత్వం వ్యవసాయ విద్యకు అత్యధిక ప్రాధాన్యత ఇస్తోంది : మంత్రి

తెలంగాణ ప్రభుత్వం విద్య, మౌలిక సదుపాయాల కల్పన, పరిశోధన, వ్యవసాయ రంగానికి సంబంధించిన విస్తరణకు అత్యధిక ప్రాధాన్యత ఇస్తోందని రవాణా శాఖ మంత్రి పువ్వాడ అజయ్‌కుమార్‌ తెలిపారు. సోమవారం ఖ‌మ్మం జిల్లాలోని అశ్వారావుపేటలోని ప్రొఫెసర్‌ జయశంకర్‌ తెలంగాణ రాష్ట్ర వ్యవసాయ విశ్వవిద్యాలయం అనుబంధ వ్యవసాయ కళాశాలలో రూ.7.35 కోట్లతో నిర్మించిన బాలికల హాస్టల్‌ భవనాన్ని మంత్రి ప్రారంభించారు. అగ్రికల్చర్‌ కోర్సును ఎంచుకున్న విద్యార్థులను అజయ్‌కుమార్‌ అభినందించారు. అగ్రికల్చర్ సైన్స్‌ని ఎంచుకోవ‌డ‌మంటే దేశ ప్రగతిలో పాలుపంచుకోవడం, దేశానికి సేవ చేయడం, దేశాన్ని రక్షించే సైనికులకు ఆహారం అందించడం లాంటిదని అన్నారు.

బీఆర్‌ఎస్‌ ప్రభుత్వం ఏర్పడిన తర్వాత ముఖ్యమంత్రి కే చంద్రశేఖర్‌రావు రైతులకు ఉచిత విద్యుత్‌, సాగునీరు, ఎరువులు, విత్తనాలు, రైతుబంధు, రైతుబీమా వంటి సౌకర్యాలు కల్పించి వ్యవసాయాన్ని అభివృద్ధి చేశారని అజయ్‌కుమార్‌ అన్నారు. వ్యవసాయ విస్తరణాధికారుల ద్వారా కోట్లాది రూపాయలను రైతులకు అందజేస్తున్నామన్నారు. వ్యవసాయ విద్యార్థులకు ఇది గర్వకారణం. విద్యార్థులందరూ మంచి వ్యవసాయ అధికారులుగా మారి వ్యవసాయాన్ని లాభసాటిగా మార్చేందుకు రైతులకు విలువైన సలహాలు ఇవ్వాలని ఆయన ఆకాంక్షించారు.