Subashini : నటి సుభాషిణి ఆత్మహత్య

తమిళ టీవీ పరిశ్రమ నుండి దిగ్భ్రాంతికరమైన వార్త వెలువడింది. ప్రముఖ నటి సుభాషిణి బాలసుబ్రహ్మణ్యం ఈరోజు తుదిశ్వాస విడిచారు. కుటుంబ కలహాల కారణంగా ఆ నటి ఉరి వేసుకుని ఆత్మహత్య చేసుకున్నట్లు సమాచారం. ఆమె తన పుట్టినరోజుకు కేవలం కొన్ని రోజుల ముందు ఈ చర్యకు పాల్పడ్డారు. సుభాషిణి చెన్నైలోని తన నివాసంలో ఆత్మహత్య చేసుకున్నారు.

ప్రముఖ తమిళ సీరియల్ 'కాయల్'లో కీలక పాత్ర పోషించి ఆమె పేరు పొందారు. శ్రీలంక మూలాలున్న ఈ నటి, చెన్నైలోని అయ్యప్పంతంగళ్‌లో ఒక అపార్ట్‌మెంట్‌లో నివసిస్తున్నారు. ఈ విషాద ఘటనతో ఆమె అభిమానులు దిగ్భ్రాంతికి గురయ్యారు, ఆమె సహనటులు చాలామంది సోషల్ మీడియాలో తమ విచారాన్ని వ్యక్తం చేశారు. ఈ ఘటన గురించి సమాచారం అందుకున్న వెంటనే, పోలీసులు ఆమె పార్థివ దేహాన్ని వైద్య పరీక్షల కోసం పంపించారు.

సుభాషిణి మరణవార్త అభిమానులను, సినీ పరిశ్రమను దిగ్భ్రాంతికి గురి చేసింది. ఆమె స్వస్థలం శ్రీలంక. ఆమె 2012లో 'ఇని అవన్' చిత్రంతో సినీ పరిశ్రమలోకి అడుగుపెట్టింది. సుభాషిణి అనేక లఘు చిత్రాలు, సామాజిక అవగాహన వీడియోలలో కూడా పనిచేసింది. సుభాషిణి తన భర్తతో వీడియో కాల్‌లో వాగ్వాదానికి దిగిన‌ట్లు స‌మాచారం. మానసిక క్షోభ కారణంగా ఆమె ఈ చర్యకు పాల్పడి ఉండవచ్చని అధికారులు పేర్కొన్నారు.

ఆమె ఏప్రిల్ 12న తన పుట్టినరోజును జరుపుకోవాల్సి ఉంది. అంతేకాకుండా, ఇదే నెల ఏప్రిల్ 21న ఆమె రెండవ వివాహ వార్షికోత్సవం కూడా సమీపిస్తోంది. ఈ నటి సోషల్ మీడియాలో చాలా చురుకుగా ఉండేవారు; ఆమెకు ఇన్‌స్టాగ్రామ్‌లో 4 లక్షలకు పైగా ఫాలోవర్లు ఉన్నారు.