'ఉస్తాద్ భ‌గ‌త్‌సింగ్' గా ప‌వ‌న్‌.. అదిరిపోయిన ప‌వ‌ర్‌స్టార్ లుక్‌

ప‌వ‌ర్‌స్టార్ ప‌వ‌న్ క‌ళ్యాణ్ వ‌రుస చిత్రాల్లో న‌టిస్తూ పుల్ బిజీగా ఉన్నారు. ఆయ‌న హ‌రీశ్ శంక‌ర్ ద‌ర్శ‌క‌త్వంలో ఓ చిత్రంలో న‌టించ‌నున్నారు అన్న సంగ‌తి తెలిసిందే. తాజాగా ఈ చిత్రానికి సంబంధించిన అప్‌డేట్ వ‌చ్చింది. ఈ చిత్రానికి 'ఉస్తాద్ భ‌గ‌త్ సింగ్' అనే టైటిల్‌ను ఫిక్స్ చేశారు. ఈ విష‌యాన్ని చిత్ర నిర్మాణ సంస్థ మైత్రీ మూవీ మేకర్స్ సోష‌ల్ మీడియా వేదిక‌గా తెలియ‌జేశారు. ఓ కొత్త పోస్ట‌ర్‌ను విడుద‌ల చేశారు.

'మ‌న‌ల్ని ఎవ‌డ్రా ఆపేది' అన్న‌ది ట్యాగ్ లైన్‌. ఈ సారి కేవ‌లం ఎంట‌ర్‌టైన్‌మెంట్ మాత్ర‌మే కాదు అంటూ మూవీ థీమ్‌లైన్ కూడా ఇచ్చారు. ఇక ఈ కొత్త పోస్ట‌ర్ ప‌వ‌న్ ఓ చేత్తో హార్లీ డేవిడ్సన్‌ బైక్‌ను.. మరోచేతిలో టీ గ్లాస్ పట్టుకుని గంభీరంగా క‌నిపిస్తున్నాడు. ప‌వ‌న్‌ని ఇలా చూసి అభిమానులు సంబురాలు చేసుకుంటున్నారు. కొద్ది సేప‌టి క్రిత‌మే విడుద‌లైన ఈ పోస్ట‌ర్ ప్ర‌స్తుతం సోష‌ల్ మీడియాలో వైర‌ల్‌గా మారింది.

ఈ చిత్రానికి దేవీశ్రీ ప్ర‌సాద్ సంగీతాన్ని అందిస్తున్నాడు. ఇక ఈ చిత్ర షూటింగ్ త్వ‌ర‌లోనే ప్రారంభం కానున్న‌ట్లు మేక‌ర్స్ చెప్పేశారు. కాగా.. ఈ చిత్రం త‌మిళ చిత్రం 'తెరి' రీమేక్ అనే ప్ర‌చారం సాగుతోంది. అయితే ఇది తెరి రీమేకా లేక కొత్త క‌థా అన్న‌ది తెలియాల్సి ఉంది.