ఆ పని నేను చేయలేదు: అనంత శ్రీరామ్

సోషల్ మీడియాలో పొలిటికల్ పార్టీల అభిమానులు చేసే రచ్చ అంతా ఇంతా కాదు. ఒక నాయకుడిని విమర్శించడానికి మరో నాయకుడిని ఇష్టం వచ్చినట్లు తిట్టడం.. కుటుంబ సభ్యులను కూడా తిడుతూ వెళ్లడం కూడా జరుగుతూ ఉంటుంది. అభిమానం అతిగా మారితే కూడా చాలా డేంజర్. ఆంధ్రప్రదేశ్ లో సోషల్ మీడియాలో పలు పార్టీలకు చెందిన మద్దతుదారులు ఉంటారు. విమర్శలు అందరూ ఒకే విధంగా చేయరనే సంగతి తెలిసిందే..! ఇటీవల పొలిటికల్ మిసైల్ అనే సోషల్ మీడియా అకౌంట్లలో దివంగత నేత, మాజీ ముఖ్యమంత్రి వైఎస్ రాజశేఖరరెడ్డిపై పలు పోస్టులు పెడుతున్నారు. వైఎస్సార్‌ను అవమానపరుస్తూ, ఆయనకి వ్యతిరేకంగా ఈ పోస్టులు ఉంటున్నాయి. వైసీపీ కార్యకర్తలు విమర్శిస్తూ.. సినీ గేయ రచయిత అనంత శ్రీరామ్ దీని వెనుక ఉన్నారని ఆరోపించారు. ఈ పొలిటికల్ మిసైల్ అకౌంట్లకు అనంత శ్రీరామ్ అండగా ఉన్నారని, ఆయనే వ్యాఖ్యలు రాసి ఇస్తున్నారని ప్రచారం మొదలైంది.

నాటా సభల్లో పాల్గొనడానికి అమెరికా వెళ్లిన అనంత శ్రీరామ్ కు ఈ విషయం కాస్త ఆలస్యంగా తెలిసింది. దీంతో ఆయన ఒక వీడియో ను సోషల్ మీడియాలో పెట్టారు. ఈ పోస్టుల వెనుక తాను లేనని ఆయన స్పష్టం చేశారు. దివంగత ముఖ్యమంత్రి, మహానేత శ్రీ వైఎస్ రాజశేఖరరెడ్డి గారికి వ్యతిరేకంగా, ఆయన్ని అవమానపరిచేలా పొలిటికల్ మిసైల్ అన్న ఖాతాలో కొన్ని రాతలు రాస్తూ పోస్టులు పెడుతున్నారు. ఆ రాతల వెనుక, పోస్టుల వెనుక ఉన్నది నేనే అని చెప్పి వదంతులు వ్యాపించాయి. నాకు.. ఆ రాతలకు, పోస్టులకు ఏమాత్రం సంబంధం లేదన్నారు. నేను అన్ని పార్టీలకు పాటలు రాస్తాను. అది నా వృత్తి. అంతేకానీ, ఏ పార్టీ మీద వ్యక్తిగతంగా నాకు ఏ అభిప్రాయం లేదు. అవన్నీ నమ్మొద్దని వైసీపీ శ్రేణులకు విజ్ఞప్తి చేస్తున్నానని అన్నారు. ఒకవేళ భవిష్యత్తులో రాజకీయాల మీద ఎలాంటి అభిప్రాయాలు తెలియజేయాల్సి వచ్చినా నిక్కచ్చిగా నిర్భయంగా తన అధికారిక సామాజిక మాధ్యమాల్లోనే తెలియజేస్తాను తప్ప వేరే పేర్లతో పెట్టిన ఖాతాల్లో తెలియజేయనని అనంత శ్రీరామ్ వివరణ ఇచ్చారు. భారతదేశానికి తిరిగి వచ్చిన వెంటనే సైబర్ క్రైమ్ పోలీసులకు ఫిర్యాదు చేస్తానని చెప్పారు.