నటుడు బాలా అరెస్ట్.. మేనేజర్ కూడా బుక్

నటుడు బాలా అలియాస్‌ బాలకుమార్‌ ను కేరళ పోలీసులు అరెస్ట్ చేశారు. మాజీ భార్య అమృత సురేశ్‌ ఫిర్యాదు మేరకు కడవంత్ర పోలీసులు సోమవారం ఉదయం బాలాను అరెస్ట్‌ చేశారు. బాలా తనను సోషల్ మీడియా పోస్ట్‌ల ద్వారా అవమానించాడని, అతని వీడియోలు తమ కుమార్తెకు మానసికంగా హాని కలిగించాయని అమృత తన ఫిర్యాదులో పేర్కొంది. బాలా మేనేజర్ రాజేష్‌ను కూడా పోలీసులు అదుపులోకి తీసుకున్నారు. కొచ్చిలోని నటుడి ఫ్లాట్‌లో ఇద్దరినీ అరెస్టు చేశారు.

తన కూతురిని చూడకుండా అమృత అడ్డుకుంటోందని బాలా గతంలో ఆరోపించారు. తన తండ్రి ప్రవర్తన కారణంగా తాను, తన తల్లి మానసిక క్షోభను అనుభవిస్తున్నామని వివరిస్తూ ఓ వీడియోను బాలిక Instagram లో పంచుకుంది.

బాలా తన ఫేస్‌బుక్ లైవ్ వీడియోలో కుమార్తె వాదనలను కొట్టిపారేశాడు. కనీసం తనను తండ్రిగా గుర్తించినందుకు తన కుమార్తెకు కృతజ్ఞతలు తెలిపారు. ఇది నా జీవితంలో అత్యంత బాధాకరమైన అనుభవమని లైవ్ వీడియోలో బాలా చెప్పాడు. తాను సొంత కూతురితో వాదించే తండ్రి కాదని చెప్పాడు. బాలా, అమృత ల వివాదం కొన్ని నెలలుగా ముఖ్యాంశాలలో ఉంది. ముఖ్యంగా అమృత తాను అనుభవించిన గృహహింస గురించి ప్రపంచానికి వెల్లడించడంతో వివాదం బయటకు వచ్చింది.